Premier League nomawi inchuh boruak a sang; Arsenal leh Man City inthlauhna point khat!
Premier League champion nih hi thil awlsam a ni lo - Arsenal champion hnuhnung bera nau piangte khan college an kal phak tawh a, vote an thlak leh tawh - ṭhangkhat lian zet a liam hnuah beiseina an nei sang leh mek.
Gunners hian Pathianni zan 'North London Derby' khelh zawh takah Tottenham Hotspur chu 3-2 in an hneh a, league hmahruaitu an nihna chu hun rei vak lo chhung atan point liah an dah sang.
Mahse, Man City an inkhel zui ve leh a, champion lai hian Nottingham Forest chu 2-0 in an hneh. An inthlauhna chu point khatah an ti tlem leh nghal, vawi khat lek chetsualah an dinhmun a inthlak nghal daih thei reng tihna a ni.
Laipui a puak
Tottenham Hotspur Stadium hi tun season chhunga Manchester United leh Liverpool te lo tlawm tawhna hmun a ni a, coach Mikel Arteta leh a naute tan pawh chetsual theihna hmun a nih avangin a tir aṭangin an fimkhur.
A tir lamah Spurs an phur a, ball pawh an chang hnem zawk - mahse Pierre-Emile Hojbjerg chuan Bukayo Saka-a corner pet chu anmahni lamah a ti lut a, goal hmasa ber luh hnuah pawh Spurs goal bawh a na hle.
Tottenham defender Cristian Romero-a'n hnai tak aṭangin goal ban a tauh per a, hemi hnu hian Micky van de Ven-a'n siphurh sutah a inngai. Mahse, Dutch defender hi a vanduai a, VAR hmanga enlet hnuah offside vangin pawm a ni lo. Spurs an vanduai chhunzawm a, penalty hmuh an inbeiseinaah pek an ni lo a, Arsenal lamin vuak let nan an hmang thung.
Minute 27-naah Saka kan hmu zui - counter attack aṭangin Arsenal an hlauhawm, forward Kai Havertz-a'n hla taka awm Saka a hmu fuh a, ball a pe fuh chat. English forward hian amah vengtu chu awmlsam taka paltlangin goal hnihna a khung.
Chawlhlawk hmain Havertz chuan Declan Rice-a corner pet chu chiang zetin a tauh lut a, chawlhlawk an hman meuh chuan Gunners lamin si thum faiin hma an hruai, chak tur chu a chiang nghal tiin a sawi ngam der.
Spurs an tlawm
Goal thum an chhuah avangin Tottenham hian beisei nei tawh loah an inngai. Mahse, goalkeeper David Raya chuan beiseina a siamsak, awlsam taka ball pet chhuah mai tur chu Cristian Romero a pass ringawt - Argentine defender hian awlsam takin a khung.
Spurs an phur thar a, bench aṭanga lut Richarlison chuan boruak rawn chawh nun a tum viau bawk. Rice-a'n box chhungah Ben Davies a pettlu a, VAR hmanga endik hnuah penalty chawiin Son Heung-min chuan an goal hnihna a khung a, khung belh tumin an bei zui.
Season thara Champions League khelh tum Tottenham lain hun tawp dawnah nawr chiam mah se goal dang a sual chhuak zo tawh lo a, mualpho taka tlawm thei dinhmuna an din hnuah goal hnih an khung avangin an mualphona a nep - point erawh an hmuh phah ta chuang lo.
Ange Postecoglou-a naute hian league match 33 aṭangin point 60 an nei a, table-ah pangana an ni mek. Ningani zan hian Chelsea an tlawh dawn a, kar tawpah Liverpool khel turin Anfield an tlawh ang, season tawp hmain Man City an la hmachhawn dawn bawk a ni.