Team ṭha berin kan koin kan hria - Mizoram manager

Swami Vivekananda U-20 Men’s National Football Championship khel turin Mizoram team an inpuahchah mek a, May 8, Nilaini hian Aizawl an chhuahsan dawn.

Mizoram team hi record nei ṭha coach HC Zarzoliana'n a ho dawn a, manager hi Hnahthial DFA secretary C. Lalramdinsanga (RD-a) niin assistant coach-ah MPL10-a Chanmari FC enkawltu Laldampuia a awm thung.

Mizoram manager RD-a chuan, "Uluk takin player kan thlang a, tun dinhmuna Mizoram U20 ṭhat theih dan berin kan thlang chhuakah kan ngai. Phai rama la kal lote kan awm a, chaw ei te kan thlak hunah kan nihna tak chu a hriat ang. Tun dinhmunah chuan kan naute khelh danah kan lungawi khawp mai," tiin Vanglaini a hrilh.

Swami Vivekananda U-20 Men’s NFC-ah hian team 32 an tel a, group pariatah pali zelah ṭhendarh an ni. Inelna hi April 12, 2024 aṭang khan khelh ṭan a ni tawh a, phase lia ṭhendarh a ni.

Phase 1-ah group E (West Bengal, Uttarakhand, Punjab leh Tamil Nadu) leh group C (Uttar Pradesh, Karnataka, Jharkhand leh Ladakh) ten an khel a, phase 2-ah group A (Chandigarh, Himachal Pradesh, Odisha leh Manipur) leh group H (Sikkim, Telangana, Bihar leh Andaman & Nicobar) ten an khel thung.

Phase 3-ah group B (Chattisgarh, Pondicherry, Goa leh Delhi) leh group D (Kerala, Haryana, Andhra Pradesh leh Gujarat) ten an khel. Mizoram hi phase 4-ah tel a, he phase-ah hian group G (Tripura, Madhya Pradesh, Assam leh Arunachal Pradesh) leh group F (Rajasthan, Mizoram, Meghalaya leh Maharashtra) te an tel a ni.

Mizoram hian match hmasa berah Meghalaya chu May 12, Pathianni hian an hmachhawn ang. Group khat aṭangin a sang berin quarterfinal an lut ang a, Mizoram awmna group-a pakhatna hian semifinal-ah group G pakhatna an hmachhawn ang.