Mizo nula hockey khel thiam te feh chhuak

Hockey India Senior Women's National Championship neih zawh taka a ti ṭha zual pariatte tana buatsaih - Under 21 National Women's League 2024-2025 (Phase I) neih a ni dawn a, inelna hmachhawn turi Mizoram team pawh an feh chhuak.

Mizoram hian May 27, Inrinni khan inelna neihna tur hmun Ranchi an pan a, zanin dar 8:00 hian Jharkhand nen an match hmasa ber an khel ang. Jharkhand bakah hian Haryana, Maharashtra, West Bengal, Manipur, Madhya Pradesh leh Odisha te an hmachhawn ang.

League hi Phase I leh II a awm dawn a, tun Phase I neih turah hian final match awm hran loin round robin league-a khelh tur a ni. Khelh ṭhat dan a zirin team standing siam a ni ang. Mizoram team te hi manager - K. Lalchamreii, Jt Secy, Hockey Mizoram leh coach Lalroṭhuami, NIS, Hockey Thenzawl ten an kalpui a ni.