A hunah tak Haaland

Erling Haaland chu a hunah tak a inlar chho leh ta. Season hmasa a hman ṭhat em avangin kuminah beisei a phak lo deuh a, sawisel a hlawh deuh hman - mahse a hunah tak rawn inlarin tunah chuan Manchester City a chakpui leh ta.

Pathianni zan Premier League inkhelah Man City hian Josko Gvardiol leh Haaland te goal hmangin Nottingham Forest chu 2-0 in an hneh a, league match khelh hmabak pali an la neihah an chak vek a nih chuan midang result ngaihchan tel ngai loin nomawi an humhim ang.

Man City goal pahnih hi Kevin de Bruyne siamsak a ni a, striker Haaland hian ball pangngai ve maia ngaih a hmuh chu box chhungah a lalut a, goalkeeper Matz Sels-a'n a rawn nan chin hmain goal kilah a khung a, an chak a nemnghet a ni.

Sawisel han hlawh ve deuh mah se Haaland hian Premier League goal 21 a khung tawh a, ani aia khung tam an awm lo. Season a hman ṭhat loh ṭum pawh hi midang tan chuan elphak a la ni chuang lo tihna a ni a, khung belh turin hun remchang a la nei bawk.

Man City manager Pep Guardiola chuan, "Kan duh angin thleng thei ni se la chuan kan elpui te hi chak lo se ka duh. Mahse, chutiang chu a thleng kher lo ang, chuvangin league match pali kan la khelh turah hian chak vek chu kan tih theih sang ber a ni ang.

"A nihna takah chuan season hmasa ai kha inelna a huatak hle. Nottingham khelmuala inkhelh pawh a harsa, inkhelh harsatna tak hmun aṭanga point thum kan hlawh chhuak thei kha kan vannei hle a ni," tiin a sawi a, chesual loa kaltlang an tum tih a sawi bawk.

Man City hi tun hnaiah a zawnin league match vawi nga an chak a, an hmabak paliah chak vek an tum dawn. An hmabak pali zinga pathumah London club an hmachhawn dawn a, hun harsaah hian an tawnhriat neih ṭhat tawh a pawimawh ang.