Zanin dar 12:30-ah UCL semifinal first leg Bayern Munich Vs Real Madrid

UEFA Champions League-ah English club an tel tawh lo a, team tel erawh an la hraw hle. Zanin dar 12:30 hian vawi 14 champion tawh Real Madrid leh vawi ruk champion tawh Bayern Munich ten Allianz Arena-ah UCL semifinal first leg an khel ang.

Semifinal second leg hi Santiago Bernabeu-ah May 8, Nilaini zan hian khelh leh tur a ni. May 1, Nilaini zan hian Borussia Dortmund leh PSG ten semifinal hnuhnung zawk an khel dawn. Dortmund hi vawi khat champion tawh an ni a, PSG erawh la champion ngai lo an ni thung.

Team lian pahnih

Bayern Munich hi German football roreltu an ni a, tun season-ah Bayer Leverkusen lakah Bundesliga nomawi chan mah se German club zinga player nei ṭha ber an la ni tho. Chumi nemnghettu chu Leverkusen right back Josip Stanisic hi Bavarians aṭanga loan hmanga an hawh a ni.

Thomas Tuchel-a'n season tawp rualin Allianz Arena a chhuahsan dawn a, German manager hi a chet ṭhat loh avangin transfer bazarah pawh a hlu tawk lo. Club lian zawk aṭanga zawmna lian zawk a neih theih nan Tuchel-a tan UCL nomawi chawi a pawimawh takzet.

Real Madrid nena an inkhelh tawhna thlirlet pawhin Bayern hian Los Blancos hi an elpha. Vawi 26 an inkhelh tawhah Bayern hi vawi 11 an chak a, Real hi vawi 12 chakin vawi thum an inhnehtawk thung. Bayern hian an intum tawhnaah hian goal 39 an khung a, Real hian goal 41 an khung a, inthlauhna hi a tlem hle.

An inhmachhawn hnuhnung ber chu 2017-18 semifinal kha a ni a, Real Madrid-in aggregate-ah 4-3 in hnehna an chang. Spanish club hian a zawnin vawi thum UCL knockout stage-ah hnehna an chang a ni.

Rinkai Real

Real Madrid hi vawi 14 zet champion tawh ni mah se quarterfinal-ah khan Manchester City lakah rinkai lo zawk an ni. Semifinal-ah erawh La Liga champion mai tur Real Madrid hi rinkai zawk an ni a, Allianz Arena-ah pawh chak zawk tura ngaih an ni hial.

First leg-a hian Dani Carvajal hrem vangin a khel dawn lo a, Real tan buaina tur awmin a lang lo. Kartawp inkhelah Ancelotti chuan player pawimawh Toni Kroos, Jude Bellingham leh Rodrygo te a awltir tawp.

Player pawimawh dang Vinícius Júnior, Eduardo Camavinga, Federico Valverde leh Antonio Rudger te chu bench aṭangin a luhtir a, Bayern an hmachhawn hmaihin hahdamna hun ṭha an neiah a ngaih theih a ni.

Mahse maw!

Nomawi beisei tur dang nei tawh lo Bayern-in Real Madrid lakah an theihna zawng zawng an chhuah dawn a, hei tak hi Ancelotti leh a hote tan pawha harsa tur chu a ni.

Ancelotti hi manager a nih hnuah Bayern Munich lakah a la tlawm ngai lo a, Real tan chuan inrintawk phahna tur a ni. Heti chung hian Bavarians legend Lothar Matthaus chuan, "Real lakah Bayern hi chhetein chak turin an rinawm zawk," tiin a sawi ve thung.

Bayern hian Real inngahna Bellingham leh Kroos te hi Bundesliga lamah an hrechiang a, Spanish club ṭhatzia pawh an hrechiang. German midfielder Joshua Kimmich chuan, "A tawpah an chak leh ṭhin. An theihna a san bakah an rilru put hmang vang a ni. Real hi team ṭha an ni a, chuvangin hmachhawn pawh hi a châkawm," tiin a sawi.

Bayern hi an player hlui Arjen Robben-a'n a tlawh a, ani hi Real Madrid player hlui ni ve tho mah se Bayern-ah sulhnu a nei ṭha zawk. Dutch international hlui hi Bayern ṭantu tur a ni dawn a, Bavarians player-ten an fan-te chu kawr sen ha turin a ngen.

Zanina thil chiang tak chu Allianz Arena-ah kawr sen hain Bayern ṭantuten an player-te an au phur dawn a, first leg result hian final khel tur pawh thui tak a hril ang.