Indian Super League - Bagan nge nge kan ti!

Mohun Bagan Super Giant-in club lian zia an chhuah a, Indian Super League semifinal second leg-ah Odisha laka hnehna changin final an lut - Mizote ṭan rawn, Mizo tamna Odisha-in ISL final an khel dawn ta lo.

Pathianni zan khan ISL semifinal second leg hi khelh a ni a, Mohun Bagan-in 2-0 in hnehna an chang - Odisha mualah 2-1 in tlawm mah se, inkhel pahnih belhkhawmah 3-2 in an chak a, final an lut daih.

Bagan-in boruak sang an ngam ṭhin tih an pholang nawn a, Odisha tan tih theih dang a awm lo. Kolkata club tan hian Jason Cummings leh Sahal Abdul Samad ten goal khat ve ve an khung a, Odisha-in khualmualah goal an nei ve thei lo.

A vawi khat nana ISL semifinal khel Odisha tan an chak loh dan hi a 'na' - Sahal hian hun pek belh minute thumnaah Bagan goal hnihna hi a khung a, extra time khel tura an inpuahchah lai mekin final lut tur chinfelin a awm.

A goal hma

Mohun Bagan boss Antonio Lopez Habas-a'n goal khung an mamawh tih hriain 3-4-3 formation a hmang a, kil tinah goal nawr nuam ti player a dah emaw tih mai tur a ni - tlarhmaah Anirudh Thapa, Dimitri Petratos leh Jason Cummings te an inkawp thei a, a hnungah Manvir Singh leh Liston Colacao ten an la thlawp cheu bawk!

Kolkata club hian minute 22-naah goal an khung nghal a, Salt Lake Stadium-a fans 60,000 chuang pungkhawm an sapatal. Bagan tan hian Dimitri Petratos-a shot chu Amrinder Singh-a'n a dang a, mahse, a per lehlam chu Cummings hian harsatna nei loin goal-ah a chantir.

Odisha hian rei lo te hnuah si phurh sutna remchang an nei a, mahse, Roy Krishna-a'n ṭha taka ball a lakluh hnua Diego Mauricio tana a siamsak chu Brazillian forward hian hnai set sawt aṭangin goal-ah a chantir thei lo.

Bagan lakah an striker hlui Krishna a hnawksak reng a, mahse, Fiji captain ke hmui zan a ni lo. First half hun pek belhah Isak Vanlalruatela pawhin chance duhawm a nei a, mahse, hnai set sawt aṭanga a tauh chu goal line aṭangin an lo dang - uiawm tak a ni.

A pawi zo ta

Odisha tan Isaka bakah Jerry Lalrinzuala leh K. Lalṭhathanga (Puitea) ten inkhel bul an ṭan a, Odisha boss Sergio Lobera-a'n goal khung ngei a duh a, minute 45-naah midfielder Puitea la chhuakin forward Jerry Mawihmingthanga a luhtir bawk.

Mahse, fans puihna nena khel Bagan an inringtawk a, tlarhnungah an ṭang khawng tlat. Bench aṭanga luhtir Jerry Mawia leh Isaka te pawhin chance duhawm an nei a, mahse, an chance neih goal-ah an chantir thei tlat lo.

Minute 90 a pel a, extra time khelh a ṭul mai dawn niin a lang hman. Mahse, Bagan-in ngaihdan dang an nei - hliam damkawr, first leg pawh bench-a hmang tluan Sahal Abdul Samad a inlar a, final luhna goal a khung.

Indian attacking midfielder hian hun pek belh minute thumnaah Manvir Singh-a siamsak chu a pal lut tiin a sawi theih a, Odisha player-te an ṭhu hnawk - Bagan an chak a, final an lut.

An phu zawk

Odisha midfielder Puitea'n Bagan tan lo khel tawhin, ISL nomawi hial a chawipui a, a hrechiang - final boruakah chuan an danglamna a lang ṭhin tih a sawi a, a sawi ang ngeiin si phurh sut mamawh sa Bagan an talbuai lo.

Tun season-a Odisha-in ISL semifinal an thlen theih nana player thawhhlawk tak Isak Vanlalruatfela chuan, "A vanduai zawkah kan ṭang a, a uiawm duh khawp mai. Kan inkhelh hma khan a phu zawkin final an luh tur thu ka sawi a, chak an phu zawk a ni mai," tiin Vanglaini a hrilh.

Isaka chuan sawi zawmin, "Semifinal-a chak loh chu rilru a na duh. Mahse, Pathian remruat chu keini dan theih a ni lo a, kan thlen chinah ka lawm tawk," a ti - tun season-ah match 24 khela goal li khungin, assist vawi thum a nei.

Odisha tana Mizo player pawimawh zingah Puitea chuan match 23 khelin, goal khat leh assist vawi khat a nei. Jerry Rinzuala'n match 23-ah vawi khat assist a nei a, Jerry Mawia pawhin match 17 khelin goal hnih leh assist vawi khat a nei thei.