Silva a chhuak dawn

Chelsea defender Thiago Silva chuan season tawpah Chelsea a chhuahsan tur thu a sawi a, kum 2020-a Paris St-Germain aṭanga free transfer-a Blues pantu chuan, "Chelsea hi ka tan chuan a hlu em em. He hmunah hian kum khat cham turin ka lo kal a, mahse, kum li ka khel ta zawk a ni," a ti.

Brazil tan vawi 113 inlana goal sarih khungtu defender hian Blues a pan hnuah inelna hrang hrangah match 151 khelhsakin, Champions League, FIFA Club World Cup leh UEFA Super Cup-ah te champion nomawi a chawi.

Kum 39 mi Silva chuan, "Mangṭha tia inthlah hi thil harsa tak a ni a, a bik takin kan inngainat tawn chuan a harsa lehzual ṭhin. Mahse, Chelsea mi leh sa ka ni tawh a, ka ni reng ang," tiin a sawi.

Silva hi Blues legend Frank Lampard-a lakluh niin, Thomas Tuchel, Graham Potter leh Mauricio Pochettino hnuaiah a khel a, tun season inelna hrang hrangah match 34 khelin, league match 25-ah bul a ṭan.

AC Milan tan pawha lo khel tawh Silva chuan, "He hmunah hian ka lo kir leh theih ka beisei," a ti a, London club-ah eng hna emaw ber chelh tura a kir leh a inring - Silva hian an ram club Fluminense-ah kir a duh thu a lo sawi tawh a, Brazil lamah a career a mangṭha dawn niin a lang.