Last 16-ah Alcaraz a lut

Madrid Open khelh laiah champion nomawi kawl mektu Carlos Alcaraz chuan last 16 a lut. Spanish star hian Pathianni zan khan Thiago Seyboth Wild chu 6-3, 6-3 a hnehin round sang zawk a in vaw kai a ni.

Spain khawpui Madrid-ah hian Alcaraz hi a khel ṭha ṭhin hle, kum 2022 leh 2023 khan a zawnin a champion a, kuminah hian a zawna a vawi thum nan nomawi chawi leh tura rinkai ber tiin a sawi ngam.

Kum 20 mi Alcaraz chuan, "Ka tan chuan fiahna ṭha tak a ni, point chauh en chuan inkhel awlsam tak angin a lang mai thei, mahse a ni hauh si lo. Ka khelh dan, taksa leh rilrute fiahin a awm vek," tiin a sawi.

Grand Slam vawi hnih champion tawh Alcaraz hian quarterfinal lut tur chuan Jan-Lennard Struff a paltlang a ngai dawn, season hmas final-ah khan player pahnihte hi an lo intawng tawh bawk.

Mipa singles inkhel dangah Andrey Rublev chuan seeded 27-na Alejandro Davidovich Fokina chu 7-6 (12-10), 6-4 in a hneh. Polish tlangval Hubert Hurkacz pawhin German player Daniel Altmaier chu 6-4, 7-6 (7-2) in a hneh.

Hmeichhe inelna lamah seeded pahnihna Aryna Sabalenka chuan fiahna a hmachhawn a, inkhel hautak takah Danielle Collins chu 6-1, 6-7 (5-7), 6-4 in a hneh, chak tur hian darkar hnih leh minute 29 lai hun a mamawh a ni.

Kar hmasa lama Stuttgart Open champion Elena Rybakina pawhin Mayar Sherif 6-1, 6-4 in a hneh a, inkhel dangah Wimbledon champion Marketa Vondrousova erawh Mirra Andreeva lakah 7-5, 6-1 in a tlawm thung.