Spain-ah chuan Bagnaia bawk a chak

Spanish Grand Prix a nih tawh chuan Francesco Bagnaia hmel a lo lang ṭhin. MotoGP champion lai hian Pathianni zan khan hnehna a chang - Jerez tlankawngah a zawnin vawi thum a chak ta.

Circuito de Jerez-ah hian tun season rider championship hmahruaitu Jorge Martin a chesual a, a tlan tluan ve thei lo. Tualchhung tlangval Martin hian lap 11-naah a bike a thunun zo lo a ni.

Italian rider Bagnaia a tlan chak ber a, a hnungah hian MotoGP vawi ruk champion tawh Marc Marquez a thleng; Ducati bike khalhtu Marco Bezzecchi chu pathumnaah a thleng ve bawk.

Hnehna changtu Bagnaia chuan, "A pawimawh ber chu lap hmasa ber kha a ni, theihtawp chhuahin ka bei nghal a, ka elpui Jorge pawhin bei viau mah se a vanduai ṭum a tawng a, pawi ka tihpui hle.

"A tawp lamah Marc nen na takin kan inum, ani nena inum hi chu engtik lai mahin a awlsam ngai lo," a ti. Marquez-a'n ngai a awh chho leh mek a, champion tuma inum pawh a ti ngaihnawm zual hle tura ngaih a ni.

Bike intlansiakna sang ber hi May 12, Pathianni tlai hian France Grand Prix an tlan chhunzawm leh ang.