Springfield HSS an champion

Khelo India Women's Football League Mizoram 2023-24 final-ah Springfield HSS chuan St. Joseph HSS chu 2-0 a hnehin an champion. Final hi nimin khan Lammualah khelh a ni a, Springfield tan Lalsangpuii Sailo leh Vanlalrohlui ten goal an khung.

Inelna hi Sports & Youth Services Department leh Mizoram Football Association te buatsaih niin April 23, 2024 aṭang khan Lammualah khelh ṭan a ni. Team pali SYS FC, Mt Carmel School, St Joseph HSS leh Springfield HSS ten inelna hi an hmachhawn. Vawi khat ṭheuh an inkhelh kual hnuah a sang pahnihin final hi an khel.

Republic Venga awm Springfield HSS hian group match hnuhnung berah 6-1 zetin St Joseph HSS hi hneh lo mah se a pawimawh hun tak 'final-ah' an hneh.

Final-a goal pawimawh khungtu Lalsangpuii chu best player-ah thlan a ni a, MFA Women's League neih zawh takah khan Sangpuii hi top scorer a lo ni tawh bawk. Tun ṭum inelnaah erawh St Joseph forward Lallawmzuali'n goal 10 khungin top scorer a ni thung. St Joseph final-ah an vanduai a, pahnihna leh fair play award-ah an lungawi a ṭul.

Khelo India Women's Football League hi MFA Women's League nen ngaih pawlh lo tur a ni a, MFA Women's League chu Mizoram chhunga hmeichhe inelna sang ber niin club inelna a ni.