Man United an inṭhuah fai dawn

Manchester United-in season tharah Champions League an khel pha dawn lo a, club neitu thar Sir Jim Ratcliffe hnuaiah team din thar an tum.

English club hian an player ṭhahnem tak chu hralh an tum a, Marcus Rashford pawh hralh tur zingah a tel. PSG pawhin Man United academy chhuak Rashford hi Kylian Mbappe thlak nan an duh niin an sawi ṭhin a, tun hnaiah erawh French club-in an duh tawh lo niin sawi a awm thung.

Erik ten Hag-a hnuaia khelhna hmun chang ṭha naupang duhawm Rasmus Hojlund, Kobbie Mainoo leh Alejandro Garnacho te chauh chu nghet ṭha tura sawi an ni.

Thuthang awm danah chuan captain Bruno Fernandes, goalkeeper Andre Onana leh full back Diogo Dalot te dinhmun pawh a chiang lo. Player pathumin kum nga daih contract thar an ziah aṭang khan thla 12 em pawh a la liam lo.

Mahse, Man United player-te hi an man phuin an hralh kher ang em, tih hi zawhna awm chu a ni. English club hian player man to tak takin la lut ṭhin mah se an player an hralh to ṭhin lo. Kum 2021 khan Daniel James chu Leeds United-ah £25mtd-in an hralh a, hei hi £20mtd chuanga player an hralh hnuhnun ber a ni.

Dutch manager Eric Ten Hag leh technical director thar Jason Wilcox te chuan inbiakna an nei tawh a, club thuneitu lamin squad dinhmun leh an harsatna tak an hre tawh turah a ngaih theih ang.

Europa League khel turin Man United tan Premier League-a parukna nih a ngai a, a nih loh chuan FA Cup final-ah Manchester City hneh a ṭul dawn. Man United hi league-ah paruknaah an awm mek a, Newcastle United aiin point khat chauhin an hmu tam. May 15 hian Old Trafford-ah team pahnih hi an inhmachhawn dawn.

Man United hian player leina tur sum an neih theih nan inkhel en man thlenga an tihtam pawh a ṭul ang. Chutihrualin tawnhriat nei player contract a tawp. Chung zingah chuan striker Anthony Martial leh defender Raphael Varane te an tel a, hei hian sum hman tur a tihtam phah thei ang.

Fiorentina aṭanga loan-a an hawh Sofyan Amrabat pawh a kir dawn. Mahse, Christian Eriksen leh Casemiro ten kum khat leh kum hnih contract an la nei a, anni pahnih hian season an hmang ṭha lo.

Nikum nipuiah khan Harry Maguire leh Scott McTominay te hralh an tum kha a ni a, tun season-ah che ṭha mah se an man phu tawk dawrtu an awm chuan hralh an phal mai a rinawm.

Loan hmanga chhuak mek midfielders Donny van de Beek (Eintracht Frankfurt) leh Hannibal Mejbri (Sevilla) te hi an loan chhuahnaten chelh an tum lo niin a lang bawk. Player hmabak nei ênga an sawi Mason Greenwood leh Jadon Sancho te pawh chhuahtir dan an zawng dawn.

Man United manager Ten Hag hian kum 2025 thleng daih contract a ziak a, club neitu tharte hian Dutch manager thar hi chelh an tum a nih chuan contract an pawhseisak a ṭul ang. Chutihrualin an chelh ta lo a nih chuan, Ten Hag hi a club hlui Ajax lamin an duh nghal.

Man United hian season thar lo awm tur 2024-25 season hi insiamremna atan hman an tum a, 2025-26 season aṭangin nomawi el pha nih theih an inbeisei. Mahse, Sir Alex Ferguson-a chhuah hnuah Man United hi kum tinin insiamṭhat an la tum a, manager ṭhahnem tak thlak tawh mah se ngai an awh thei rih lo.