Dortmund mualah Mbappe awmna PSG

Borussia Dortmund chuan zanin dar 12:30 hian Champions League semifinal first leg khel turin Paris Saint Germain an lo mikhual dawn - German club tan final lut turin mahni muala tlawm loh a pawimawh hle ang tih a rin theih.

Team pahnihte hi Group khatah an awmdun tawh a, nikum December thla khan Signal Iduna Park-ah hian goal khat ve ve khungin an lo inhnehtawk tawh - Paris khawpuia an intawn ṭum erawhin PSG hian si hnih faiin hnehna an chang thung.

Mbappe awmna

Player ṭha leh thiam tih zawng a inang vek lo - tunlaia player ṭha ho kan sawi a nih erawh chuan Kylian Mabppe kan hmaih thiang lo ang. France captain hian PSG tana a tih tur ang ang chu a ti zo thawkhat tawh, a hmabak awmchhun chu Champions League nomawi chawipui a ni.

Ligue 1 champion tan Mbappe hian tun season tawp thleng daih bak contract a nei tawh lo a, pawhsei tumna a nei tawh rih lo - tun season hi PSG tana UCL champion a nih theihna hnuhnung ni dawnin a lang, theih ni se Dortmund hneha final luh ngei a duh ang.

Lionel Messi, Neymar leh Segio Ramos te awm laiin PSG hian UCL title an la thei lo. Mbappe an la nei a, a tha ti chak turin Randal Kolo Muani, Ousmane Dembele leh Goncalo Ramos te an neih belh bawk, coach tawnhriat nei ṭha Luis Enrique-a'n a ho bawk avangin boruak a danglam.

Dortmund tan PSG tlarhma sir lama awm Mbappe leh Dembele te ven ngun an ngai dawn, anni pahnih hi Barcelona pek chhuaktute kha an ni a, zaninah an thiam an theihnghilh thut lo ang. Tun hma lama an la tih theih ngai reng reng loh UCL champion nih an tum dawn a ni.

Enrique naute hian season bul ṭan nan Super Cup an la tawh a, Ligue 1 champion an nih fel tawh bakah French Cup final an lut tawh bawk; UCL title an la thei a nih ngat chuan Enrique ngei pawhin Mbappe chu cham turin a rilru an hneh theih a rin thu a lo sawi tawh, chak a duhna a sang dawn hle.

Dortmund boruak

Player an neih dan leh season an hman chhoh dan thlir chuan Borussia Dortmund hi rinkai lo zawk an ni mai thei, mahse Champions League a nih chuan PSG aiin sulhnu an nei ṭha zawk - Dortmund bakah Bayern Munich ten tun season UCL an khel ṭha; German club hi zuam chi an ni dawn lo.

Dortmund tana buaina awm thei chu Sebastien Haller a ni - Atletico Madrid an hneh ṭuma inhliam Haller hi kerek hliam vangin Bundesliga lamah a inlan zui lo, a dinhmun a chiang lo mek. Forward Donyell Malen pawh damkawr mai a la ni - Jadon Sancho chungah mawhphurhna a lian ang.

Sancho hi Manchester United tana a khelh lai ang kha a ni ngawt lo, jersey eng a hak chuan player danglam daih a ni. Dortmund coach Edin Terzic chuan, "Haller leh Malen te dinhmun kan ngaichang reng a, mahse 100% ni nghal thlap tur chuan thil a harsa.

"Traning kan neihna hmunah Jadon-a'n a thiam thil a lantir a, a thawkrimin khelmual chhungah a nihna tak a lantir leh ngei kan ring tlat a ni," a ti. Terzic-a hian a defender pawimawh Mats Hummels pawh PSG hmachhawn tura a inpeih hman a beisei thu a sawi bawk.

Dortmund hian kar tawp Bundesliga inkhelah RB Leipzig chu 4-1 in an ngam lo, he inkhelah hian Hummels hi hliam vanga lakchhuah a ni. German defender hi a inlan thei a nih chuan tawnhriat a neih tawhte chu team tan a ṭangkai ang, damkawr chunga Mabppe dan tum erawh a hautak hret mai thei.