Hma lam panin Nadal a kal

Rafael Nadal chuan a theihna tak pholang turin kawng dik a zawh leh mek. Spanish star hian Thawhṭan zan khan Pedro Cachin hnehin Madrid Open khelh laiah last 16 a inhlangkai leh ta.

Grand Slam vawi 22 champion tawh Nadal hi awlsam taka chak mai erawh a ni bik lo. Argentine player hi world number 91 daih ni mah se hmachhawn a awlsam lo, darkar thum leh minute ruk an inkhelh hnuah Nadal hi 6-1, 6-7 (5-7), 6-3 in a chak.

Madrid Open vawi nga champion tawh Nadal hi Spain khawpuia inlena ngaihhlutah hian a inlan hnuhnung ber a nih a rinawm a, chuvangin a ṭha leh sang thei ang bera hun tawp hman a duh ngei ang.

Kum 37 mi Nadal hian a match lehpekah chuan world number 31 Jiri Lehecka a hmachhawn leh ang. Clay court inelna lian French Open khel tura inbuatsaihna a nih nghal avangin atan a pawimawh zual hle.

Inkhel dangah Daniil Medvedev pawhin set a hloh hnuah hnehna a chang. Russian tlangval hi point hnih lek hloh leh se la chuan chak lo thei dinhmunah a ding hman, mahse a tawpah Sebastian Korda chu 5-7, 7-6 (4), 6-3 in a hneh.

Felix Auger-Aliassime erawhin harsa lo takin Jakub Mensik a hneh, a khingpui hi a kiu hliam vangin a inhnukdawk a; Auger-Aliassime hi 6-1, 1-0 in a tlang. Cameron Norrie erawh Casper Ruud lakah straight set hmangin a tlawm.