Silly Point : Ṭomir Sipicial

Tata IPL 2024 thla tawpna leh league stage hmawr bawkna tur chu kan lo thleng leh ta der mai. Hetianga Round 14 inkhel kual tura round 10 an khelh tawh hnuah, franchise tel team 10-te a tu a mah tla chiang tawh leh knockout round lut chiang tawh la awm miah loh ṭum hi IPL history-ah hian a la awm kher lo ang.

Royals Pahnih

IPL History a champion hmasa ber Rajasthan Royals te kumin an khel a hmuhnawm hle. Captain Sanju Samson-a'n team a kaihruai dan a ropui hrih thlawt a. Group stage a hmahruaitu an ni pawh hi thil mak a ni lo a, champion tur pawhin tun dinhmunah chuan a buk rit ber an ni hrih awm e.

Royal Challengers Bengaluru erawh, an thiampuipa Virat Kohli-a'n run siam tam ṭhin mahse, an ball vawmtu te lamin a aia tam zawk an lo ti leak ve zel a angin a mawngphahah an awm lo thei lo. Chutihrualin match hnuhnung pahnihah an chak a, knockout stage lalut thei tho an ni.

Champion lo tur?

La Champion ngai lo, Delhi Capitals leh Preity Zinta-i naute Punjab Super Kings te hi, kumina an inkhelh dan han thlir hi chuan, champion nomawi hawn chu an la hlat hmel hrih khawp mai. Engtikah tak champion ve dawn maw? Danglamna thlen thei (impact) player an dah fuh tawk lo ṭhin hian he team pahnih te khel hi nasa takin a nghawng tih chu hai rual a ni lo. He round li vel lek khelh tur an neih tawhah hian, dawhkan inher zawng thlak danglam hman tak maw?

Bandhu & Macha

Lo champion fo tawh Shah Rukh Khan-a naute Kolkata Knight Riders leh MS Dhoni-a ho Chennai Super Kings erawh, an IPL history-a league stage an khelh ṭhat tum ber ni lo mah se, a ngaihna hi an hre ve riau tawh.

Knockout stage thleng thei tura rinkai ber pawl an ni leh ngei ang. An champion nomawi hunna lamah pakhatin an pun belh pawn, thilmak em em a nih loh hmel. Kolkata leh Chennai velah chuan , "Bandhu, in khel ṭha e. Macha, in che ṭha hrih e," an inti hrih ngei ang.

Bombay to Aijal

Mumbai lamah Hardik Pandya-a'n, Pi Nita Ambani team enkawl chu a rin ang ngawtin a lo awlsam lo tih a ni tela a hriatchhuah mek laiin, Zawlkhawpui lamah Central YMA Inter Branch Cricket Tournament pawh khelh mek zel a ni.

Veng leh veng, branch leh branch a ni bawk a, Ṭomir thla ni sen sa hnuaiah, cricket boruak a hot telh telh dawn niin a lang. Team ṭha Ramhlun Venglai, Durtlang, Chanmari etc te an la dam vek. An tlem tial tial ang a, inkhel quality a sang tawlh tawlh thung ang.