Barca tan Lewy hattrick a tawk
Thawhṭanni zan La Liga inkhelah Barcelona tan striker Robert Lewandowski chuan hattrick a siam a, Valencia lakah a team chu 4-2 in hnehna a chanpui - champion beisei tawh lo mah se, Barca tan chak zel hi a pawimawh.
Catalan club tan Lewy bakah Fermín López chuan goal khat a thawh ve bawk a, Valencia tana Hugo Duro leh Pepelu (penalty) te goal khung chu scoreline cheimawina bak an tling phak lo.
Valencia-in hun pek belh minute linaa an keeper Giorgi Mamardashvili hnawhchhuah an tuar tiin a sawi theih a, Georgian keeper awm loh hnuah goal an khung tawh lo a, Lewy-a'n hattrick a siam thung.
A pawi zo ta
Barca tan López chuan minute 22-naah goal hmahruai a khung a, Valencia hian Hugo Duro leh Pepelu (penalty) hmanga chhangletin, 2-1 in hma an hruai. Mahse, first half hun pek belhah Valencia an chesual.
Goalkeeper Giorgi Mamardashvili chuan ât a so, penalty box pawnah a kutin ball a tawk. Mamardashvili hian back pass a dang per a, hemi nangchingtu Lamine Yamal-a'n goal ruaka a khung hmain a kut a hmang!
Kum 23 mi Georgian keeper hi red card pek nghal a ni a, Valencia-in hmahruaitu ni chungin chawlhlawk hmang mah se, player kim loin second half-ah an lut tawh dawn tih a chiang a, Barca fan-ten beiseina an nei thar.
Barca an chak
Second half ṭantir aṭangin Lewy a inlar a, minute 49-naah corner aṭanga ball kal chu tauh lutin si phurh a sut a, mahse, a duhtawk mai lo. Minute 82-naah an goal hnihna a tauh lut a, hun pek belhah freekick hmangin chakna goal a khung zui.
Barca-in table-ah pahnihna dinhmun an luah chhunzawm zel a, European football khelh tum Valencia tan erawh result lawmawm lo a ni - La Liga table-a pasarihnain Europa Conference League an khel dawn a, Valencia hian pasarihna Real Betis chu league match nga khelh tur la awmah point hnihin an phak lo mek.
Hetihrual hian hnual viauna tur erawh a ni lo. Valencia hian Europa League pawh an la beisei thei a, Europa League khel tur, paruknaa awm chin Real Sociedad an phak lohna chu point li chauh a ni.
A hming Lewy
Xavi-a'n season tharah pawh Barca a enkawl chhunzawm tur thu a sawi hnua an match hmasa berah Catalan club an chak a, an player langsar ber chu Xavi fachuam tiha mawi Lewandowski a ni.
Kum 35 mi a nih ve tawh avangin Lewy hian Bayern Munich-a a vanglai a phak tawh lo tih chu thil chiangsa a ni a, chutihrual chuan khingpui team hrem turin theihna a la nei reng tih a pholang.
Lewy hian tun season inelna hrang hrangah match 44 khelin goal 23 a khung a, assist vawi kua a nei. Barca tan season hnih a khelhna chiah niin, match 90 a khelhsak tawh a, goal 56 khungin, assist vawi 17 a nei a, La Liga leh Spanish Super Cup nomawi a chawi tawh.