Championship champion Leicester City

Premier League an khel dawn tih a chiang tawh a, tunah chuan Championship title an la dawn tih a chiang leh ta - Leicester City chuan Preston North End chu 3-0 a hnehin league champion an nihna an ti chiang.

Foxes hian an mikhualna ramah buaina an tawk lem lo. Table laihawla awm Preston North End lakah hian Jamie Vardy-a'n goal hnih a khung bakah Kasey McAtee chuan an goal thumna leh chak nemnghehna a khung ve bawk.

Leicester City hian tun season Championship match vawi 45 an khelh aṭangin vawi 31 hnehna an chang a, English football inelna sang pahnihnaah hian season khat chhunga chak tam ber record nihrual theihna hun ṭha an nei.

League match hnuhnung berah Blackburn an mikhual dawn a, an chak a nih chuan 1919-20 season daih tawha Tottenham Hotspur record lo siam tawh vawi 32 chak chu an nihrual ang.

Foxes hi EPL champion an nihna kha a la rei lo - FA Cup an lakna pawh kum tam a la liam lo, mahse season hmasa kha an hman ṭhat loh em avangin English football inelna sang ber aṭangin an tlahniam a nih kha.

Season khat a liam a, striker ṭha leh tawnhriat nei tam Vardy hoin EPL-ah an kir leh dawn. Burnley, Fulham leh Norwich te angin EPL aṭanga tlak hnuah season khat lek hnua kir leh thei an ni ta chiah bawk.

Leicester City manager Enzo Maresca chuan, "A hautakin a harsa a, thahrui a ngai hnem hle. Leicester City nihna tak kan pho lang thei a, tunah chuan kan awmna tur hmun dik tak EPL-ah kan kir leh tawh dawn.

"Season ṭha tak kan hmang a, nomawi kan beisei pawh kan hlawh chhuak - tun hi hlima lawm hun chu a ni a," a ti a, match hnuhnung berah pawh inthlahdah an tum chuang lo tih a sawi bawk.

Championship aṭang hian season tin team pathum chu EPL khel turin an tling ṭhin. Leicester City an tling chiang tawh a, pahnihna Leeds United leh Ipswich Town ten point 90 ve ve hmuin league match hnuhnung berah Foxes zui tur zawk tih chian a ni ang.

Southampton, Norwich City leh Wesy Brom te chi playoff khel phak chinah an awm mek a, pasarihna Hull City pawhin an chunga awm West Brom an phak lohna point hnih lek a nih avangin playoff an la beisei thei ve bawk.