Quarterfinal-ah Swiatek a lut

Iga Swiatek chuan Madrid Open khelh laiah quarterfinal a lut - seeded pakhatna hian Sara Sorribes Tormo chu straight set hmanga hnehin last 16 a paltlang a ni.

Thawhṭanni zan inkhelah world number 1 hi a chak nuamsa hle, set hnih an khelh chhungin game khat chauh hloh chungin 6-1, 6-0 in a chak. Game hmasa berah a service hloh mah se, a hnuah a zawnin game 12 a la!

Kum 22 mi Swiatek hian hnehna chang turin darkar khat leh minute hnih bak a mamawh lo, a match lehpekah chuan Beatriz Haddad Maia a hmachhawn leh ang, inkhel dangah Brazilian nula hian Maria Sakkari chu 6-4, 6-4 in a hneh.

Champion thei tur zinga mi Ons Jabeur pawh a chak. Tunisian star hian seeded pakuana Jelena Ostapenko chu 6-0, 6-4 in a hneh. Season hmasa Wimbledon finalist hian Madison Keys a hmachhawn leh ang.

American player Keys hi hmachhawn a awlsam dawn lo - inkhel dangah Keys hian world number 3 Coco Gauff nen darkar hnih leh minute 31 an inkhelh hnuah 7-6 (7-4), 4-6, 6-4 in hnehna a chang a ni.

Kum 17 mi chauh la ni mah se Mirra Andreeva a hmunnawm zel. Russian rawlthar hian 7-6 (7-2), 6-4 in seeded 12-na Jasmine Paolini a hneh a, a match lehpekah chuan Danielle Collins hnehtu Aryna Sabalenka a hmachhawn leh ang.