James hoin Lakers an tla

LeBron James vanglai a pel tawh a, thil harsa leh ropui tak tak hlen chhuah pawh a harsa tan - James awmna Los Angeles Lakers chu Denver Nuggets hneh loin NBA playoff aṭangin an tla.

Nimin zing game 5 inkhelah Lakers hi 108-106 in an chak lo, best of seven series khelh turah Nuggets hi 4-1 in an chak. An chak theih nan Jamal Murray chuan second 3.6 lek awm tawhah point a nei a, a pumpuiah point 32 neiin a team a chakpui.

Kum 39 mi James-a'n point 30 a neih bakah assist ṭum 11 a nei bawk a, Lakers tan tha la thawhhlawk viau mah se chak nan a tawk zo tawh lo - a vawi nga nana NBA champion nih a tumna chu a thlawn ta rih.

A hma hun zawhna chhangin James chuan, "Tunah chuan engmah ka sawi thei rih lo, inah hawin ka hahchawl phawt ang a, chumi hnuah ka sawi thei chauh ang," a ti. James hian Olympic hmain Las Vegas lamah training neih a tum tih chu a lo sawi tawh a ni.