Old Trafford-ah Arsenal lenglut dawn

Kum 20 liam ta chu ni se Premier League-ah Manchester United leh Arsenal inkhela aia lian a awm lo. Sir Alex Ferguson leh Arsene Wenger te ringawt kha en chhan tham a tling a, Roy Keane leh Patrick Vieira, Ruud van Nistelrooy leh Thierry Henry bakah player langsar ṭhahnem tak an awm. A pawimawh ber erawh khatih hunlai kha chuan an champion ṭhin.

Tun hnaiah erawh an champion ngai ta lo. Arsenal-in league nomawi an chawi hnuhnun ber chu 2003–04 daih tawh kha a ni. Man United pawh 2012–13 season-a Ferguson hoa an champion hnuah league nomawi an chawi tawh lo.

Tun season-ah pawh club pahnih hi an champion a rinawm lo a, amaherawhchu Man United leh Arsenal inkhel erawh sawi nep a rem lo. November 1, Pathianni zan dar 10:00 hian Old Trafford-ah an inkhel dawn a, tun kartawp inkhel ṭhahnem tak zinga en châkawm ber a ni ang.

Arsenal-in Mikael Arteta hnuaiah team thar din an tum a, Pep Guardiola hnuaia thawk ṭhin Arteta-a'n a pu hlui a tluk mai lohna chhan tur chu sum hman tur a ngah tawk lo.

Chutihrualin Arteta hi Gunners thuneituten Pierre-Emerick Auba-meyang an chelhsak a, hming langsar Willian leh Thomas Partey te an laksak avangin transfer-ah an che chhe hran lo. Arsenal hi league match vawi ruk an khelh tawh aṭangin vawi thum an chak a, vawi thum an chak lo.

London club-in season bul ṭan ṭha lo mah se club dang an chet chhiat ve tho avangin hmahruaitu Everton an phak lohna hi point li chauh a la ni. Arteta hote hian an league match hnuhnung pahnihah Manchester City leh Leicester City 1-0 ve ve in an hneh lo a, goal khungtu an mamawh tih a lang.

Striker chhuanvawr Aubameyang-a'n match nga chhung goal a khung tawh lo a, United nen Gabon striker hi a chet ṭhat a pawimawh ang. Auba thlawp tur hian Alexandre Lacazette, Willian, Pepe leh rawlthar Bukayo Saka te an awm a, khelh fuh ṭumah chuan mamawh chhanna ni thei an ni.

Tun hnaiah Man United-in goal an khung hnem avangin Arsenal tan tlarhnung thuam ṭhat a pawimawh dawn a, defender pali David Luiz, Calum Chambers, Rob Holding leh Pablo Mari te an inhliam avangin helai position hi an buaina a ni. Europa League-ah Arteta-a'n defence phuah chawpin Granit Xhaka, Shkodran Mustafi leh Sead Kolasinac te a rem a, Dundalk lakah goal chhuah lo mah se fiahin an awm lo a tih theih bawk.

Arsenal hian United nen David Luiz a dam hman an beisei a, Brazilian defender awm ta lo pawh ni se Gabriel, Hector Bellerin leh Kieran Tierney te an dam ṭha. Arteta hoten point hlawhchhuah tumin Old Trafford an tlawh ang.

Ole Gunnar Solskjaer tan Arsenal nena an inkhel tur hi Manchester United match 100 a enkawlna chiah tur a ni a, Norwegian manager chuan, "Thil tam tak thleng bawk mah se hun hi a kal chak khawp mai. Arsenal hi chu engtik lai pawhin an harsa, match 100 enkawlna lawm nan chak ngei a duhawm hle," tiin a sawi.

Man United-in hliam thar lam an nei lo a, player thar Alex Telles erawh Covid-19 positive vangin chhawr theih a ni dawn lo. United hian Spurs laka an mualpho hnuah nasa takin hma an sawn a, Newcastle 4-1 a sawpin Europe-ah PSG (2-1) leh RB Leipzig (5-0) te an hneh ve ve. An match hnuhnung palia an result chhe ber pawh Chelsea nen goal awm loa an inhnehtawk a ni a, Arsenal an hneh thei lo a nih chuan an lungawi lo ang.

United boss Solskjaer chuan, "Pogba hian khelmuala tih theih tur zawng zawng hi chu a ti thei vek mai a, tlarhma puih pawh a thiam zawng tak a ni. A theihna ang ti thei tura a fit ṭhat a pawimawh," tiin a sawi. French midfielder hi match thum chhung bench-a a awm hnuah Leipzig lakah inkhel bul a ṭan.

Chutihrualin United-in midfield ṭhahnem tak an nei a, Ajax aṭanga an lakluh Donny Van de Beek pawhin khelhna hmun chan a harsat. Tun hnaia an khelh dan thlir chuan Bruno Fernandes leh Fred te chu khel ngei tura ngaih an ni a, tlarhma lamah pawh duh thlan tur an tam. Hrem vangin Anthony Martial khel thei lo mah se Leipzig laka hattrick siamtu Marcus Rashford bakah Mason Greenwood leh Edinson Cavani te an awm avangin buaina tur a awm lo ang.

Europa League-ah Arsenal-in Ningani zan khan Irish champion Dundalk an mikhual a, Mikael Arteta-a'n kartawp Premier League inkhel ngai pawimawhin player ṭha tam zawk a awltir. Chutihrualin Spanish manager hian Dundalk hneh thei tur player a luhtir a, Emirates Stadium-ah 3-0 in hnehna an chang.

Gunners tan hian Eddie Nketiah (42'), Joe Willock (44') leh Nicolas Pepe (46') ten goal khat ṭheuh an khung a, point thum hlawhchhuah kawngah harsatna an tawk lo.

Arsenal hi group B-ah awmin match hnih khelhah point ruk an hmu a, an hnuai chiaha awm Molde nen an point hmuh zat a inang. 

Arteta chuan, "Club langsar lo deuh tum hian inthlahdah a awl ṭhin. Tun ṭumah erawh ka player-te rilru put hmang a dik a, kan khelh danah ka lungawi hle," tiin a naute a fak.

English rawlthar duhawm Eddie Nketiah-a'n Arsenal tana goal a khungna inkhel match kuaah hnehna an chang vek a, kum 21 mi hian Gunners tan goal 10 a khung tawh a ni.