Dawhtheih a ngai - De Bruyne

Manchester City mid-fielder Kevin De Bruyne chuan result ṭha nei tur chuan dawhtheih a pawimawh thu a sawi a, season kal laiah pawh ngelnghet taka an khelh theih nan dawhtheihna bawk chu an mamawh niin a sawi bawk.

Pep Guardiola nauten season bul an ṭan fuh lo, an khelh ṭhat tawk loh chhan hi player inhliam an ngah vang chu ni bawk mah se, an squad chhah dan ngaihtuah chuan club dang chunga leng thei tur chu an la ni tho.

City hian Thawhlehni zan khan Champions League-ah Marseille 3-0 in an hneh a, player thar Ferran Torres bakah Ilkay Gundogan leh Raheem Sterling ten goal khat ṭheuh an khung.

KDB chuan, "Ṭha taka kan khelh ṭhin ang khan khelh chhuah leh kan la tum reng, mahse team dang hian a kalphung an hria a, an inzir nasat a vangin a harsa tawh. A tlangpui thuin kan khingpuite hian tlarhnungah player panga, midfield-ah palyer pali an dah ṭhin.

"Tlarhnung lam an ven nasat ṭhin avangin goal khung hnem hi a harsa viau, chutiang hunah chuan dawhthei taka kan khelh a ngai ṭhin. Marseille lakah pawh khan dawhthei taka kan khelh rah chu kan seng, chhawm nun kan tum ang," a ti.

Man City hian zanin dar 6:00 hian Premier League khel turin team talbuai Sheffield United an lenchilh zui dawn, a hniam ber dawta awm lai Sheffield lakah hian chak tura rinkai zawk an ni ang.

Tun season league match nga an khelh tawh chinah Guardiola naute hian point riat chauh an hmu a, table-ah 13-na dinhmun an luah hram. Sheffield erawh chak ni hmel an la hmu lo, match ruk aṭangin point khat chauh an la hmu.