Allianz Arena-ah 2-2; Santiago Bernabeu-ah a vawrtawp!

UEFA Champions League semifinal first leg-ah club ropui pahnih Bayern Munich leh Real Madrid te 2-2 in an inhnehtawk a, Allianz Arena-ah chak zawk an awm lo. Santiago Bernabeu-ah chinfel a ni dawn a, Madrid khawpuiah football hmuhnawm chhawpchhuah a ni ang.

April 30, Thawhlehni zan inkhelah Vincius Junior hmanga mikhual team hmahruaina chu Bayern-in Leroy Sane leh Harry Kane te hmangin chhanglet mah se Real tan Vinicius bawkin siphurh a sut. UCL-ah away goal rule a awm tawh lo a, semifinal thawh hnihnaah chuan penalty thlengin a beisei theih ang.

Hun ṭha bawhpelh

Bayern Munich-in season an hmang ṭha tawk lo a ni thei a, mahse player ṭha an kawl tam avangin theihna sang tak an la nei reng. Ṭan phat aṭangin La Liga champion mai tur Real Madrid chu an kat nghal.

Second 40-na lekah Noussair Mazraoui ball pek chu Kane-a'n vawi khatah Leroy Sane tan a pe nghal a, German winger hian goalkeeper Andriy Lunin chauh a hmachhawn chungin a hlah.

England captain Kane pawhin chance dang a nei ve leh a, Ukrainian keeper Lunin bawkin a dang. Bayern-in hun ṭha an bawhpelh a, Real laka hun ṭha bawhpelhtu dang Manchester City an tla tawh tih pawh an hre ngei ang.

Kroos leh Vini

Football-ah chuan player talent nei ṭha bik an awm a, Real-in talent nei ṭha an ngah. Spanish club hian ball pass thiam Kroos an kawl a, tlan chak leh finishing ṭha Vini Jr an kawl bawk.

Minute 24-naah Kroos-a'n ball a chang a, Vini-a'n goalkeeper leh defender inkara hmun awl a awm theih nan Kim Min-jae a pawt chhuak. Kroos hian hmun ruak chu hmuin rang takin ball a ṭha thawlh a, Vini-a'n amah vengtu Kim Min-jae tlan sanin 'cool' zetin Manuel Neuer-a dah theih loin a khung.

Inkhelh banah Kroos-a'n a ball pek chu a danglam bikna a awm lo, tiin sawi mah se UCL semifinal-a Bayern tlarhnung vawi khat chetsualnaa a hrem nghal thei kha, a ropui thlawt.

Nomawi beiseitu

Harry Kane-a'n nomawi beiseiin Bayern a pan a, tun season-ah UCL chiah an beisei thei tawh. Bavarians hi nomawi duhin an tui hal a, Real meuh hmachhawn mah se tlawm an tum lo.

Chak turin goal an mamawh tih an hria a, second half-ah goal an khung ta bawk. Minute 53-naah Sane-a'n mual dinglam aṭanga ṭha taka lalutin Rodrygo, Kroos leh Ferland Mendy te inrawlh hmain kawh zetin a pet goal.

Minute thum hnuah Jamal Musiala-a'n Lucas Vazquez lakah penalty a hlawh chhuak a, first half-ah freekick hlahtu Kane-a'n keeper Lunin bumin a pet goal.

Allianz Arena-ah thawm a ṭha a, Bayern-in Real an hneh thei tih an hria - nomawi an beisei ngam tih a lang bawk.

Danglamna thlentu Vini

Real-in tlawm an duh lo a, a hma aiin an goal bawh a na sawt. Luka Modric through ball chu Vini-a'n um pha mah se Neuer-a'n a goal khung tur a dansak.

Mikhual team goal bawh a na zel a, Brazilian player dagnlamna a lang. Vini ringawt chu ven tham a tling a, Rodrygo a lo awm tel ve zel. Pressure sangah Kim Min-jae-a'n Rodrygo a bawh thlu a, penalty a chawi. Minute 83-naah Vini a rawn pen chhuak a, siphurh sutna goal khung nan Neuer a bum.

Hun tawp thlengin inkhel ṭang zui mah se goal a luh belh tawh lo. Goal hnih khungtu Vini chu player of the match-ah thlan a ni a, Santiago Bernabeu-ah pawh Brazilian winger hi a langsar ang.