Chelsea-in Amorim an dawr lo

Sporting Lisbon manager Rúben Amorim nen a ruka indawr anga an sawi Chelsea chuan Portuguese coach an dawr lo tih an sawi a, The Telegraph football writer Matt Law chuan hei hi a nem nghet.

Matt Law chuan, "Tun hnaia Amorim-a'n London a tlawh khan Chelsea chuan a kalna senso engmah an tumsak lo tih an sawi a, inbiakna pawh an nei lo," a ti.

Amorim hi kar hmasa khan West Ham nen an indawr a, London-ah Hammers thuneitute nen an inbia. Hei hi khawthlang media ṭhenkhat chuan Chelsea nen an indawrna thup nan mai maia hmang angin an tarlang a, mahse, Chelsea-in an dawr loh thu an sawi.

Blues hian Mauricio Pochettino hnuaiah indinthar tum viau mah se beisei an phak lo a, Premier League-ah pakuana dinhmun luah mekin, season thara an beisei theih san ber chu Europa Conference League playoff khelh a ni.

Premier League table-a paruknain ECL playoff hi an khel dawn a, Manchester United chu parukna an ni mek - Blues hian point rukin United hi an phak lo mek a, mahse, Red Devils ai hian match khatin an khel tlem zawk thung.

Chelsea hian zanin dar 12:00-ah league match khel turin Tottenham Hotspur an mikhual dawn a, ECL khelh an duh chuan an chak ṭan a ngai. Spurs hi season thara Champions League khelh beisei mek an ni a, an hmabak match ngaah Blues bakah Liverpool leh Manchester City chu an hmachhawn tur zingah an la tel.

Season thara Champions League khelh an duh chuan Chelsea an hneh a ṭul. Spurs hian an league match hnuhnung pahnihah Newcastle United (4-0) leh Arsenal (3-2) an ngam lo bawk a, London club lakah chak ngei an tum dawn.

Chelsea-in hliam vangin player langsar an chhawr thei dawn lo nual bawk a, a awlsam dawn lo. Season tawpa Chelsea chhuahsan tur Thiago Silva chu an match hnuhnung bera Aston Villa nen an inkhelh ṭumin hliam vanga lakchhuah a ngai a, London club tan jersey a ha leh tawh kher lo mai thei.

Reece James, Christopher Nkunku, Lesley Ugochukwu leh Levi Colwill ten tun hnaiah training zawm mah se an inlan theih a la beiseiawm lo a, Ben Chilwell dinhmun a la chiang lo.

Villa nen an inkhelh hmain Raheem Sterling a inhliam a, season tawp thleng Enzo Fernandez a inlan thei tawh dawn lo a, Wesley Fofana (khup), Romeo Lavia (malpui), Malo Gusto (khup) leh Carney Chukwuemeka (khup) te pawh hliam vanga chawl mek an ni.

Spurs tan RB Leipzig aṭanga loan-a an hawh Timo Werner chu Arsenal an hmachhawn ṭumin a inhliam a, a club hlui Chelsea hmachhawk châk viau mah se, a inlan theih a beiseiawm lo - Tottenham hian tun hnaiah player inhliam langsar dang an nei lo a, chak ngei tumin Stamford Bridge an leng lut ang.