Sixers beiseina a la nung

NBA playoff khelh mekah nimin zing khan Philadelphia 76ers chuan York Knicks 112-106 in an hneh a, Eastern Conference playoff-ah 3-2 in la hniam zawk mah se tho chhuak turin beisei an la nei.

Madison Square Garden-a inkhelah 76ers tan Tyrese Maxey chuan point 46 a nei a, a team a chakpui. Chak lo se lang chuan best of seven series chu Knicks lamin an la thei dawn tawh tihna a ni a, tunah chuan game 6 an khelh leh phawt a ngai dawn.

Inkhel tawp hma second 29 la awmah Knicks hian point rukin hma an la hruai, mahse hun tawp dawnah hian mak tak maiin Maxey-a chuan a team a chhan chhuak, chak lo zawk tura ngaih khan nih rualin overtime an khelh a ngaih phah a, a tawpah an chak zawk ta daih.

Maxey chuan, "Minute 53 chhung theihtawp kan chhuah a, kan beidawng ve ngai lo. Kan dinhmun a hniamin chan ṭha lo zawkah kan ding hman pawh a ni mai thei, tih takzeta kan beih chuan kan tho leh thei a ni tih a takin kan lantir," tiin a sawi.

Maxey bakah hian point 19 neitu Joel Embiid a langsar bawk - ani hian rebound vawi 16 lain assist ṭum 10 a nei bawk a, an chak theih nan tha an thawh hlawk hle.

May 3, Zirtawpni zing dar 6:30 hian Wells fargo Center-ah game 6 an khel leh dawn a ni.