Tuchel thlaktu tur Rangnick?

Bayern Munich chuan Thomas Tuchel thlak nan Manchester United duh loh hnu Ralf Rangnick chu an dawr mek. Kum 65 mi Rangnick hian kar liam ta khan Bundesliga club nen an indawr thu a lo tarlang tawh.

Bayern-in Bayer Leverkusen laka Bundesliga nomawi an chan hnuin Rangnick hnuaiah an indin thar theih an inbeisei.

Rangnick hian Austria hi Euro 2024 khel turin a tlinpui a, European championship atan inpuahchahna an nei mek. Bayern hian tun dinhmunah manager dang an be lo ta, tunkar tawpah thutlukna an siam ang.

Man United manager hlui Rangnick chuan, "Ka dinhmunah chuan pawisa a pawimawh lo. Ka ngaih pawimawh ber chu danglamna kan thlen thei ang em? tih a ni zawk. Tunah chuan Austrian national team-ah rilru ka pe a, Euro C'ship atan kan insawrbing a ni," tiin a sawi.

Rangnick hian 2021-22 season khan Man United chu thla ruk chhung a enkawl tawh a, German club Ulm, Stuttgart, Hannover, Hoffenheim, Schalke leh RB Leipzig te a enkawl tawh bawk.

Nimin lamah kha chuan Bayern leh Rangnick te hian inremna an nei hnai tawh takzet, niin khawthlang media ten an tarlang.