Last 16-ah Tsitsipas a tla

Vienna Open khelh laiah Stefanos Tsitsipas chu last 16 paltlang zo loin a zinkawng a tawp. Greek tlangval hi Grigor Dimitrov lakah 6-7 (5/7), 6-4, 6-3 in a chak lo - Bulgarian player hian kuminah ranking sang zual 10 zinga mi a hneh vawi khatna a ni.

World number 20 Dimitrov chuan, "Rilru zawng zawng ka seng a, ka chak theih nan khan theihtawp takzet ka chhuah. Player ṭha hneh tur chuan vanneihna neih tel a ngai ṭhin," tiin a sawi.

Austria khawpuia inkhel dangah champion lai Dimonic Thiem chuan harsa lo takin Cristian Garin 6-3, 6-2 in a hneh, tualchhung tlangval hian a match lehpekah chuan Andrey Rublev a hmachhawn dawn.

Seeded pangana Rublev hian a khingpui Jannik Sinner chu a hneh, set khatna an khelh laiin Rublec-a'n 2-1 in hma a hruai a, a khingpui hi hliam vangin a inkhel chhunzawm thei lo - thahrui sen hnem vak ngai loin hnehna a chang.

US Open champion Thiem chuan, "Rublev hi kar hmasa khan ranking lamah a sang zual 10 zingah a awm, ka hmuh dan chuan tunlai player ṭha bik panga zingah a awm," tiin a khingpui leh tur lakah fimkhur a ngaih thu a sawi.

Seeded palina Daniil Medvedev chuan Vasek Pospisil 4-6, 6-3, 6-2 in a hneh. Russian tlangval hmachhawn leh tur chu 2018 champion Kevin Anderson a ni dawn a, a hmuhnawm ang.