Europa League semifinal: Leverkusen tan nomawi dang?

Tunlai chu Bayer Leverkusen hi an 'in' rih khawp mai - tlawm nei loin Bundesliga nomawi an chawi a, DFB-Pokal final-in a hmuak a, zanin dar 12:30 hian Europa League semifinal first leg an khel leh dawn ta.

Xabi Alonso naute tan an la champion ngai lohna Bundesliga-a champion ringawt pawh thil hlu tawpkhawk a ni a, mahse, an duhtawk mai lo. Nomawi pahnih dang chawi belh an tum a, an beiseina tihlawhtling turin kawng thui tak a awm tawh lo.

Mahse, Leverkusen hmachhawn tur hi tun hnaia harhtharna chang AS Roma an ni a, a awlsam dawn lo tih a chiang - first leg hi Roma khelmualah khelh phawt a ni dawn a, Daniele De Rossi enkawl Roma leh Alonso enkawl Leverkusen inkhel tur hi en a châkawm ta hle.

Europa League semifinal inkhel dangah zanin dar 12:30 vek hian Olympique de Marseille chuan Liverpool pet chhuaktu Atalanta an mikhual dawn a, he inkhel pawh hi a en tlak dawn tih inhrilh nawn a ngai lo.

Alonso 'magic'

Liverpool midfielder hlui Alonso-a'n Bundesliga aṭanga tla thei dinhmuna ding hman Leverkusen a enkawl a, tunah chuan tlawm nei loin a champion pui - tun season inelna hrang hrangah German club hi an la tlawm miah lo!

European football-ah pawh Alonso leh a nauten tlawm loa kaltluan an duh dawn a, chumi tur erawh chuan attacking midfielder Florian Wirtz chet ṭhat a ṭul a, ani hian tun season inelna hrang hrangah match 44 khela goal 17 khungin assist vawi 19 a nei tawh.

Kum 23 mi Victor Boniface hian match 30-ah goal 18 khungin, assist vawi 10 a nei tawh a, Nigerian striker leh Writz te inkawp dang chat turin Roma tlarhnunga Gianluca Mancini leh a ṭhianten hna an thawh ṭhat a ṭul dawn.

Leverkusen hi an thiam piah lamah an vannei tel ṭhin - tun season-ah hun pek belha goal an khung zat hi vawi 16 ngawt a ni tawh a, Alonso-a'n, "Season tawp thlenga tlawm miah loh kan duh," a tih avangin Roma lakah chak an tum dawn.

Phuba chu

Roma-in semifinal an luh khan anmahni chauh an lawm lo a, Leverkusen player-te pawh an lawm - Roma tum an châk. German club hian AS Roma hi an zuam hrim hrim lam a ni lo a, season hmasa semifinal-ah khan 1-0 in an lo ngam lo tawh a, phuba lak an châk.

Leverkusen CEO Fernando Corr chuan, "Phuba lak kan châk a, hnehna chan ngei duhin kan tuihal - a engti hawi zawng pawhin final luh kan tum," a ti a, mahse, a sawi ang maia awlsam erawh a ni dawn lo.

Daniele De Rossi-a'n a enkawl hnuah Roma hian nasa takin hma an sawn a, match 20 a kaihhruai tawhah vawi 13 hnehna a chanpui thei - vawi li draw neiin, vawi thum chiah an la tlawm a, an result a ropui hle.

Italian coach hi player a nih lai pawha rorum tak kha a ni a, player a nih lai pawha player fing bik Alonso nena an intawng tur hrim hrim hi en a châkawm takzet - zaninah men rei loh a uiawm hial ang!

Roma an ṭha

De Rossi hnuaia an indinthar piahlamah AS Roma hian player an nei ṭha sa hrim hrim - zaninah pawh tlarhmaah Stephan El Shaarawy, Romelu Lukaku leh Paulo Dybala te ho an tlar thei dawn a, defensive midfielder ṭha Bryan Cristante leh Leandro Paredes te lam hmaih an thiang lo.

Winger El Shaarawy hian match 43-ah goal thum chiah la khung mah se, assist vawi riat a nei tawh a, match 42-a goal 19 leh assist vawi li neitu Lukaku pawh a hlauhawm leh dawn - match 35 aṭanga goal 16 leh assist vawi 10 nei thei Dybala theihnghilh lo la.

A tawi zawnga sawi chuan Roma leh Leverkusen inkhel a hmuhnawm dawn a, chutihrual chuan semifinal lehlama Marseille-in Atalanta an mikhual tur sawi bo pawh uiawm a tling - Atalanta hi rin loh taka Liverpool an pet chhuaktu an ni.

Ligue 1 lama beisei phak lo Marseille-in European football hmangin an chet chhiat thup an duh dawn a, striker Pierre-Emerick Aubameyang chet ṭhat erawh a ṭul. Arsenal captain hlui hian tun season match 46-ah goal 27 khungin assist vawi 11 a nei a, kum 34 ni tawh mah se French club-ah a theihna a la pholang mek.