Nadal-a'n Madrid Open a mangṭha

Rafael Nadal chuan Madrid Open a match hnuhnung ber a khel ta a, tennis court a chhuahsan dawnah a hmuna inkhel entuten mittui nen an thlah a, amah ngei pawhin hnukulh chungin a mangṭha.

Thawhlehni zan khan Nadal hian last 16 a khel a, inkhel hmuhnawm takah Jiri Lehecka chu 7-5, 6-4 in a hneh. Spain khawpuiah hian tun hmain vawi nga a champion tawh a, tun ṭumah chuan damkawr mai a nih avangin atan thlen san a harsa.

Kum 37 mi Nadal chuan, "He hmuna ka inkhel leh thei hi ka lawm, ka tan chuan chawlhkar nuam leh hlimawm tak a ni. Chak lo mah ila ṭha tak maia tennis ka khelh ve leh theih tak avangin ka hlim.

"Sawi tur leh sawi chak tam tak ka nei, he hmunah hian tun hma aṭanga ka inkhel min tlawp tlattute chungah lawmthu ka sawi," a ti. An inkhelh zawh hian Madrid Open bika a chet ṭhatna leh a lo champion tawhna te chu video hmanga tih lan a ni.

Mipa singles match inkhel dangah Daniil Medvedev chuan Alexander Bublik chu 7-6 (7-3), 6-4 in a hneh. Russian star Medvedev hian Nadal hnehtu Jiri Lehecka hi a hmachhawn ve leh thung ang.

Champion lai Carlos Alcaraz pawh a la chak zel - Spanish tlangval hian Jan-Lennard Struff lakah fiahna paltlangin 6-3, 6-7 (5-7), 7-6 (7-4) in hnehna a chang, chak tur hian darkar thum deuh thawh hun a mamawh hial a ni.

Kum 20 mi Alcaraz leh Andrey Rublev an intawng zui leh dawn - Rublev hian inkhel dangah Dutch mi Tallon Griekspoor chu 6-2, 6-4 in a hneh a, seeded pakhatna Jannik Sinner pawhin Karen Khachanov 5-7, 6-3, 6-3 in a hneh.

Australian Open champion Sinner hian kuminah nomawi pathum a chawi tawh, a vawi li nan champion a tum ang. Player langsar an chak lai hian Alexander Zverev erawh Francisco Cerundolo lakah 6-3, 6-3 a chak loin a zinkawng a tawp ve thung a ni.

Madrid Open zawh hnu hian Rome Open khelh tur an la nei dawn, tun thla chawhnu lam hian clay court inelna lian leh ropui ber French Open an la khel dawn bawk.