Aston Villa mikhual tur Olympiacos

Zanin dar 12:30 hian Europa Conference League semifinal first leg khelh tur a ni a - Premier League club Aston Villa chuan Villa Park-ah Olympiacos an lo mikhual ang.

Team pahnihte hian quarterfinal paltlang turin penalty shootout an hmang ve ve. Villa hian Ligue 1 club Lille an hneh laiin Olympiacos hi Fenerbahce hneha tlang an ni thung.

Aston Villa manager Unai Emery hi European football hrechiangtu leh champion dan thiam a ni. Tun hmain Europa League nomawi vawi thum a chawi tawh, ṭum hnih chu pahnihna dinhmun a luah tawh bawk a ni.

Spanish manager hian Villa hi season tluan anga a enkawl vawi khatna a ni a, tunah chuan nomawi duhawm tak chawipui thei dinhmunah a ding mek a, an hmabak erawh awlsam taka paltlang thei mai chi a ni dawn bik lo.

Villa hi an goal keeper Emiliano Martinez dinhmun a chiang lo mek. Argentina international hi an match hnuhnunga Chelsea an hmachhawn ṭumin a inhliam a, thlak a ngai hial - chawlhkar hnih vel a chawlh a ngai dawn nia sawi a ni.

Hliam vangin Boubacar Kamara, Emiliano Buendia, Tyrone Mings, Jacob Ramsey, Alex Moreno leh Nicolo Zaniolo bakah Youri Tielemans te an chawl mek a, an ṭhat dan takin mikhual an thleng thei dawn rih lo.

Aston Villa tana thu lawmawm erawh striker ṭha Ollie Watkins an nei hi a ni. England international hi tunlai striker ṭha leh hriam berte zinga mi a ni a, ani ven hi Olympiacos tana hna hautak a ni ang.

Olympiacos tan semifinal hi thil thar a ni dawn - European football inelna huangah semifinal an luh vawi khatana a ni a, final thlenga tlang chhoh an duh a nih chuan Villa muala goal chhuah tam loh a pawimawh hlein a rinawm.

Semifinal lehlamah Fiorentina chu Club Brugge mualah an lut dawn. Player an neih dan leh tun hma lama an sulhnu thlir chuan Italian club hi buk rit zawk tura ngaih an ni a, chutihrualin a thiam pali zinga tel phak an nih tawh avangin chak chiang sawi theih a ni lo.