Premier League leh Ipswich inkarah point khat!

Leicester City-in season tharah Premier League an khel dawn tih a chiang tawh a, Foxes hnungzui turin Ipswich Town an inpuahchah mek - Championship-a match khat khelh tur la awmah point khat an hmuh chuan season tharah English top flight league an khel ang.

Ipswich hian Thawhlehni zan khan Coventry City chu khualmualah 2-1 in an hneh a, mikhual team Ipswich tan Kieffer Moore chuan minute riatna lekah goal hmahruai a khung. Coventry hian Haji Wright hmangin chhanglet mah se, minute 69-naah Cameron Burgess chuan Ipswich tan a khung ve leh a, goal dang lut tawh loin, 2-1 in an chak.

Kieran McKenna enkawl Ipswich hian Inrinni zanah tlak hlau Huddersfield Town an mikhual dawn a, point khat an hlawhchhuah chuan Premier League khel turin an tling ang. Mahse, hna erawh a awlsam dawn lo.

Premier League-ah te pawh lo inlan tawh Huddersfield hi table-ah 23-na an ni mek a, Championship-a inhamtang turin chak ngei ngei an mamawh bakah, an chung lama team-te an chetsual an chan tel a ṭul a, Ipswich lakah thih thain an bei ang.

Mahse, Ipswich hi tlawm pawh ni se, Leeds United an tlawm ve chuan an tling dawn tho a, kawng zau taka hawnin a awm mek. Kar hmasa Inrinni zana 4-0 ngawta Queen Park Rangers ngam lotu Leeds United hian Irninni zanah vek Southampton an mikhual dawn a, an hna a awlsam lo.

Leeds hian Ipswich hi point thum lekin an phak lo mek a, league match tawp berah Ipswich an tlawm a, annin Saints an hneh chuan point hmuh zat inangah an tlang daih thei dawn - goal difference-ah an ṭha zawk.

Ipswich boss McKenna hi Manchester United assistant coach hlui niin, season hmasa khan League One atangin Championship khel turin Ipswich hi a hruai thleng a, season khat chiah Championship-ah an awm tihin Premier League khel thei dinhmunah an ding leh ta mek - kum 37 mi manager hnathawh hi a ropui hle.

Tractor Boys (Ipswich sawina) hi kum 2000 khan Premier League khel turin an inpetkai a, an season hmasa berah pangana ni mah se, 2001-02 khan an relegate a, kum 2002 hnua a vawi khat nan Premier League khel turin an kir hnai.