England-in squad an puang

June 2 aṭanga khelh ṭan tur Twenty20 Cricket World Cup atan England chuan squad an puang a, player 15 koh zingah hliam vanga ram tana rei tak inlan tawh lo Jofra Archer chu a tel.

Kum 29 mi Archer hi a kiu hliam avangin March 2023 hnuah khan England tan a inlan leh tawh lo a, mahse, a dam ṭan leh tak avangin West Indies leh United States ten an inthlen ṭawm tur World Cup squad-ah an telh.

Archer hian kum 2019 khan T20-ah ram tana a match hmasa ber khelin, match 15 a inlanah wicket 18 a la thei a, a dam ṭhat chuan England tan innghahna tham a tling dawn.

T20-a la inlan ngai lo left-arm spinner Tom Hartley chu a vawi khat nan koh a ni a, hetihrual hian ODI leh T20 World Cup-a England tana champion nomawi lo chawi tawh Chris Woakes chu squad-ah hian telh a ni lo.

Jos Buttler-a captain-na hnuaia khel tur England hian World Cup hmain Pakistan nen T20 series, match li an khel leh phawt dawn a, May 22 aṭangin an khel ṭan ang.

England squad-ah hian Indian Premier League-a inlan mek player pariat an awm a, mahse, Pakistan an hmachhawn hman tura ngaih niin, hetihlai hian captain Buttler erawh a nupuiin nau a neih dawn avangin a inlan vek thei dawn lo thung.

England squad

Jos Buttler (Captain, Wicket-keeper), Moeen Ali, Jofra Archer, Jonny Bairstow, Harry Brook, Sam Curran, Ben Duckett, Tom Hartley, Will Jacks, Chris Jordan, Liam Livingstone, Adil Rashid, Phil Salt, Reece Topley, Mark Wood.