Chelsea tana penalty pet tur a chiang lo

Chelsea manager Frank Lampard chuan tuin nge penalty pet chhunzawm dawn tih chu a ngaihtuah tur thu a sawi a, midfielder Jorginho mawhphurhna ni ṭhin chu midang chungah a nghat a nih pawhin a mak lo ang.

Blues tana penalty pettu pangngai chu Jorginho a ni, Italy international hian Champions League-a Russian club Krasnodar an hneh ṭumin penalty a hlah a, season kal laiah vawi hnih a hlahna a ni.

Lampard chuan, "Jorginho hi penalty chhuihtu ṭha tak a ni, a bik takin Chelsea tan a chhuih ṭha thei hle. Penalty pet hnem lutuk chuan ṭhenkhat chu hlah theih a ni, hetiang hi chu player ka nih lai khan ka hrethiam tawh.

"A penalty pet danah chuan ka buai hran lo, a goal chuan a tawk mai. Ani bakah hian Timo Werner pawhin ṭha takin a pet thei tih kan hmu, eng tiangin nge kan kalpui zel dawn tih chu kan sawiho ang," tiin a sawi.

Russian club lakah Blues hian penalty vawi hnih an hmu, a hmasa zawk Jorginho-a'n a hlah hnuah a hnuhnung zawk chu Werner-a'n a khung. German striker hi Lampard-a'n a duhsak viau a, goal khung hnem theihna kawng a zawnsak chhunzawm mai thei.

UCL lama khel hmuhnawm tak Chelsea hian zaninah Premier League an khel chhuzawm dawn, dar 8:30 hian table mawng lama talbuai lai leh tun season chhunga chak ni hmel la hmu lo Burnley an lenchilh ang.