777-in Everton ṭanpui

Premier League club talbuai Everton chuan an club leitu tur 777 Partners aṭangin pawisa an dawng leh ta a, an sum dawn zat hi £16mtd niin, club inrelbawlna tura an pek tura ruahman sa a ni a, tihian Everton hian 777 aṭang hian loan £200mtd chuang an dawng tawh tihna a ni.

777 hian Everton neitu Farhad Moshiri-a'n Everton-a 94% stake a neih chu September khan lei an rem ti tawh a, mahse, Premier League chuan tun thlengin Everton leh 777 inremna hi a la pawmpui rih lo a ni.

Everton leh 777 inremna hi Everton-in stadium thar Bramley Moore Dock sak nana MSP Sports Capital hnen aṭanga £158mtd an puk avangin Premier League hian an pawm lawk thei lo niin a lang a, Moshiri lam hnai tak chuan engkim tluang taka kalpui a nih theih nan theihtawp chhuah mek a nih thu a sawi.

Hetihlai hian 777 ta airline Bonza chu tun hnai khan tihtawp lailawk a ni a, an sum leh inrelbawlna chungchang rel fel ngai leh ngaihtuah tur a awm thar vang a ni ber - hetiang boruak ngaihtuah chuan 777 pawh hi leiba ngah tak Everton tan an rintlak ang em aw, tih chu zawhna a ni.