Antwerp lakah Tottenham Hotspur an chak lo Thlak vek mai kha ka duh hial - Mourinho

Jose Mourinho chu a naute khelh danah a lungawi lo a, theih chu ni se hun chawlh lawk an hman laiin player 11 ngawt thlak a duh hial thu a sawi. Tottenham Hotspur hi Royal Antwerp lakah 1-0 in an tlawm a ni.

Ningani zan Europa League inkhelah Spurs lamin an player neih ṭhat ber ber chu a tirah an chhawr lo, minute 29-naah goal chhuahin an sut thei lo. Belgian club laka an tlawm danah Mourinho a lungawi lo hle.

Ben Davies-a'n Tottenham tana match 200 a khelh tlin zanah hun duhawm lo a tawng, minute 29-naah a ball pek sual dawngtu Dieumerci Mbokani chuan Lior Refaelov tan a siamsak a, keeper Hugo Lloris tan dan theih a ni lo.

Gareth Bale hoa bul ṭan Spurs lamin tihsual an ngah, awmze neiin goal an nawr na thei lo. Real Madrid aṭanga loan hmanga an hawh Bale thlak turin Harry Kane dahluh a ni a, forward Son Heung-min a lut bawk. Mahse Kane leh Son te meuh pawhin goal an keng tel ta lo a ni.

Kum 2016 hnua a vawi khat nan Mourinho chuan Europa League bikah a naute a tlawm pui, group J-ah pahnihna niin point thum an nei. Inkhel dangah Austrian club Lask-in Ludogorets 4-3 a an hneh ve bawk avangin an point neih zat a inang.

Tottenham manager Mourinho-a'n inkhel boruak thlak danglam a tum a, chawlh lawk laiin Dele Alli, Steven Bergwijn, Giovani lo Celso leh Carlos Vinicius te chu a thlak rual ṭhawt. Jose chuan, "Theih ni se 11 kha thlak ka duh," tiin a sawi hial.

Portuguese manager chuan sawi zawmin, "Dem tur chu keimah hi ka ni, player khel tur thlanga ruahmantu chu ka ni. Inkhel hian zirlai ṭha tak min zirtirah ka ngai a, kan khelh chhiat avangin kan result pawh a chhia," tiin a sawi.

Tottenham hian North London an pan leh nghal a, Pathianni zan dar 12:45-ah Premier League match khel turin Brighton an mikhual ang. Belgium aṭanga an haw kawngah Mourinho chuan Inrinni chawhma lama training an neih chhunzawm nghal tur thu a sawi bawk.

Antwerp:    Butez, Seck, Gelin, De Laet, Miyoshi (Buta 58'), Gerkens, Haroun, Hongla (Verstraete 70'), Juklerod, Mbokani, Refaelov (Benavente 88'). 

Player inlan lo:    Beiranvand, Boya, Opoku Ampomah.

Tottenham Hotspur:    Lloris; Aurier (Moura 46'), Sanchez, Davies, Reguilon; Lo Celso (Hojberg 46'), Winks; Bale (Kane 58'), Alli (Son 46'), Bergwijn (Lamela 46'); Vinicius.

Player inlan lo:    Hart, Doherty, Alderweireld, Sissoko, Clarke, White, Cirkin.