Italian club an chak

Europa League inkhelah dangah Italian club pahnih AC Milan leh Napoli te chuan hnehna an chang a, Milan tan striker Zlatan Ibrahimovic chuan penalty hlah mah se a team hian Sparta Prague chu 3-0 in an hneh tho.

Milan tan hian Brahim Diaz, Rafael Leao leh Diogo Dalot ten goal khat ṭheuh an khung. Stefano Pioli naute hi tun hnaiah match 23 chhung chu chak loh nei loin an kaltluang tawh a, Serie A lamah pawh hmahruaitu an ni mek.

Covid-19 kai kum 39 mi Ibra a dam tawh a, goal khung belh theihna hun ṭha a neih erawh a bawhpelh. Pathianni tlai dar 5:00 a Udinese an lenchilh hunah pawh Swede striker hi a inlan chhunzawm ang.

Inkhel dangah Napoli chuan Matteo Politano goal khat hmangin Real Sociedad an luhchhuah a, La Liga hmahruaitu hi David Silva hoa inlan niin ball chang hnem viau mah se an khung thei lo - Italian club lamin an goal ven thiam an chhawr ṭangkai.

Napoli coach Gennaro Gattuso chuan, "AZ lakah kan chesual zauh a, tunah chuan kan nihna tak a lang chhuak leh ta. Group stage paltlang leh paltlang loh chu kan kuta innghat a ni," a ti. Group F-ah Napoli hi pahnihna an ni a, an hneh tak Sociedad hi an elpui ber tura ngaih an ni.