Dortmund tan Niclas Fullkrug-a goal a tawk!

Champions League goal mawi leh ṭha bik kan hmu a, a khungtu chu Niclas Fullkrug a ni. German forward hian Paris Saint Germain lakah goal pawimawh khungin Borussia Dortmund chu 1-0 in a chakpui.

Nilaini zan UCL semifinal fist leg-ah Dortmund an chak phawt a, final lut turin minute 90 dang khelh a la ngai. May 7, Thawhlehni zanlai hian Paris khawpuiah second leg an khel leh dawn. German club hi first leg-ah chak mah se Kylian Mbappe telna PSG hi mahni muala khel tur an nih avangin final khel tura rinkai zawk an la ni tho!

Semifinal lehlamah Real Madrid leh Bayern Munich te chu 2-2 in an inhnehtawk mek ve thung a, anni pawh hian Spain khawpuia stadium hmingthang Santiago Bernabeu-ah tlang tur an la chingfel dawn a ni.

Goal mawi chu

Signal Iduna Park-ah team pahnihin goal khung tumin an nawr ngam a, inkhel a hmuhnawm. Goal erawh a lut lawk lo - chawlhlawk hma hretin German defender Nico Schlotterbeck chuan hla tak aṭangin Fullkrug a hmu fuh a, thutlukna dik a siam.

Schlotterbeck hian tlarhma laia mi Fullkrug tan hian a kangin ball a vawrh thut - PSG defender pahnih inkarah Fullkrug rawn dawk chhuakin, a ke ding lamin ball kang a la thla a, tlan paha insiamrem zuiin a ke vei lamin a hlap lut.

Dortmund lamin an remchang neih hmasa an khung tiin a sawi theih a, midfielder Marcel Sabitzer chuan an goal hnihna a khung zui teuh hle. Box chhungah ball ṭha a hmu a, hnai tak aṭangin pet mah se keeper Gianluigi Donnarumma chuan a lo dansak hlauh.

PSG vanduai

Kylian Mbappe an nei a, coach Luis Enrique-a'n chawlhlawk laiin a naute a fuih ṭha tih a lang. France captain Mbappe-a'n a thiam dan takin box sir vei lam aṭangin ball a lalut a, pet khum mawi viau mah se goal ban a per hlauh - Dortmund an him hram.

Mbappe-a shot per hi an pet chhuak mai lo, defender Achraf Hakimi chuan goal ban bawk a pet per! PSG boruak ṭha karah Jadon Sancho a rawn inlar a, mahse a ball siamsak ṭha lutuk chu Fullkrug-a'n goal kham chungah a pet chhuak.

Ousmane Dembele-a'n harsa vak loa khung theih tura ngaih chu goal zawnah a pet thei lo bawk, a club hlui lakah a ke a hmui tlat lo. Dortmund lamin Julian Brandt-a siamsak Fullkrug tauh luh loh an ui bawk ang - second leg a la hmuhnawm dawn chiang.

Sancho tak tak

British media lian BBC chuan, "Signal Iduna Park-a inkhel zingah khan Jadon Sancho chu player ṭha ber a ni," tiin an ziak a, thu an uar deuh titawk an awm mai thei, chutihrualin khelmual chhunga chet dan erawh a hmunnawm thlawt si.

Kum 24 mi Sancho hian amah vengtu PSG left-back Nuno Mendes a chhaih buai hneh hle a, a ke aṭangin ball hlauhawm tak tak a chhuak hnem. A ball ṭha leh fing bik kha Fullkrug-a'n khung ni ngat se la chuan sawi zui a hlawh lehzual ngeiin a rinawm.

England international hi Manchester United player a ni a, mahse United tan a khel phak lo! Loan hmangin Dortmund tan hian a khel mek - German club hian a ngheta lak an hrehin a rinawm lo a, tun hma lama a vul tawhna hmunah a nghet leh a nih pawhin a mak lo ang.

Hmabak a la awm

Khualmualah chak lo mah se Paris Saint-Germain manager Luis Enrique-a'n an la tlawm lo tih a sawi. Enrique chuan, "A harsa dawn tih chu kan hre lawk, team pahnih khan chak phu khawpin kan khel chhuak ve ve niah ka ngai, result kha a mak ka ti lo.

"Tun ṭumah khan a hmunah min thlawptu mi 3,000 kan nei a, goal kan phurh lai pawhin chawl loin an zai. Paris khawpuiah chuan a brouak a danglam tawh dawn, kan khelmualah chuan inkhelh hma, inkhelh lai leh inkhelh banah a nuam vek ang," tiin a la zam lo hle.

PSG hi Ligue 1 champion an ni chiang tawh a, French Cup final lut tawhin season bul ṭan nan Super Cup an la tawh bawk. An duh ber Champions League an la thei a nih ngat chuan an duhthusam a kim tiin a sawi theih ang.

Hmasawn ngai

Borussia Dortmund coach Edin Terzic chuan hnehna chang mah se an tum ram an la thleng lo tih sawiin, "Ṭha taka khelin kan duh ang result pawh kan hmu, tun ṭuma kan khelh danah khan ka nauten fak an phut takzet tih pawh ka hria.

"Chutihrualin, inkhel a la zo lo. Kar leh hian Paris-ah kan inkhel leh dawn, tun ai hian a hautak dawn tih kan hriat a ngai, chuvangin final lut tur chuan kan thlen chin aṭanga hma kan sawn a ngai dawn hle a ni," tiin a la ṭawng fimkhur hle.

European football-ah German club an che ṭha rih a, season tharah pawh Bundesliga aṭangin Champions League khel turin team panga an inlan thei dawn. Dortmund hi table-ah pangana an ni mek, an tan chanchin lawmawm a ni ngei ang.