Women's NFC-ah Mizo referee pathum

28th Senior Women's National Football Championship for Rajmata Jijabai Trophy 2023-24 final round chu Kolkata-ah May 1, Nilaini aṭangin khelh ṭan a ni a, Mizoramin inelna hmachhawn thei lo mah se Mizo hmeichhe referee pathum an tel thung.

Mizo referee-te hi Zohmingliani (Nutei), Lunglei; Lalhruaizeli (Nupuii), ITI Veng leh Lalthansangi, Bilhkhawthlir te an ni a, anni pathum hi AIFF hnuaia inelnaah tawnhriat nei ṭha tak vek an ni tawh. An pathum hian assistant referee an ni.

Nupuii leh Thansangi te hi MPL10 neih zawh takah khan assistant referee hna ṭha takin an thawk vek a, tualchhung football tihhmasawnna kawngah an pawimawh hle.

Mizoram tan Nupuii leh Thansangi te hi player angin vawi tam an feh chhuak tawh a, MFA Women's League neih zawh takah khan an club khelhna Mizo Football News an champion pui. Nupuii hi captain niin Thansangi best player-a thlan a ni.

Women's NFC final round-ah hian team 12 an la awm. Group A-ah West Bengal, Railways, Tamil Nadu, Delhi, Chandigarh leh Punjab te awmin group B-ah Odisha, Haryana, Jharkhand, Maharashtra, Manipur leh Sikkim te an awm thung.