May 6 aṭangin MPL Under 17

Mizoram Premier League kum bithliah inelna MPL Under 17 chu May 6, Thawhṭanni aṭangin 1st Bn MAP Ground, Armed Vengah khelh a ni dawn.

Inelnaah hian MPL10 club pariat Aizawl FC, Chanmari FC, Chawnpui FC, Chhinga Veng, Electric Veng FC, FC Venghnuai, Mizoram Police leh Project Veng FC te kha an tel dawn a, inelna erawh kum 17 hnuai lam inelna a ni thung ang.

Team pariatte hi vawi khat ṭheuh an inkhel dawn a, league round-ah hian round sarih a awm dawn. Hemi zawh hian table-a a sang pahnih final an khel dawn a, nomawi inchuhna hi May 22, Nilaini chawhnu dar 2:00-ah khelh a ni ang.

MPL ṭantirh aṭang khan kum bithliah inelna hi ṭan nghal a ni a, he inelna aṭang hian player ṭha tak tak an chhuak tawh. Chung zingah chuan ISL final khel tur Mumbai FC midfielder Lalengmawia Ralte (Apuia) leh Odisha FC forward Jerry Mawihmingthanga te chu player langsar an ni.