MPL11 Qualifier fixtures a chhuak

Mizoram Premier League Season 11 khel tur zawnna MPL11 Qualifier chu May 6, Thawhṭanni aṭangin RG Stadium-ah khelh ṭan a ni dawn a, team paliin inelna an hmachhawn dawn.

MPL Qualifier-ah hian district tinin quota pahnih an nei a, Aizawl DFA aṭangin FC Bethlehem leh Bethlehem Vengthlang FC te an tel. Aizawl District pawn aṭangin Lunglei club SYS leh Lawngltai club MLS FC ten inelna hmachhawn an tum bawk.

FC Bethlehem hi ADFA First Division champion an ni a, MFA Cup-ah final thlengin Lawngtlai club MLS FC an hneh lo. Coach Vanlalpeka enkawl MLS FC hian MFA Cup nomawi an chawi avangin inrintawkna nasa tak an nei ang.

Bethlehem Vengthlang hi ADFA First Division league round-a pakhatna an nih avangin MPL qualifier hi hmachhawn thei an ni thung. Lunglei aiawh SYS hi Sports and Youth Services academy-a zirlaite an ni a, coach Lalmuankima hoa hun rei tak inpuahchah tawh an nih avangin an khel an entlak khawp ang.

MPL11 qualifier-ah hian team pali hi vawi khat ṭheuh an inkhel kual ang a, a sang ber hi MPL khel turin an tling dawn. Pahnihna tan MPL khelh theihna kawng a la inhawng a, MPL10 khelh zawh taka pasarihna Kolasib club Project Veng FC nen double legged playoff an khel ang.

MPL10 neih zawh takah Mizoram Police-in final-ah Chanmari FC hnehin a vawi khat nan an champion. FC Venghnuai erawh table mawngphaha awmin an relegate thung. MPL11 khel turin Police, Chanmari FC, Chhinga Veng FC, Chawnpui FC, Aizawl FC leh Electric Veng FC te chu tling tawh an ni.