Liverpool manager thar tur Slot - i hriat ngai loh chu!

Jurgen Klopp-a'n season tawpah Liverpool a chhuahsan dawn a, German coach hnathawh thlirin, "Tuin nge Klopp thlak ang?" tiin khawthlang media-te an inzawt vel a, Klopp-a hmun ruak meuh chu luah a harsa dawn tih a chiang.

Liverpool duh ber chu an club midfielder hlui, hlawhtling taka Bayer Leverkusen kaihruaitu Xabi Alonso a ni a, mahse, Spanish coach hian German club chhuahsan a la duh rih lo - khaw dang an hawi a ngai.

Reds hi Sporting Lisbon coach Ruben Amorim leh Brighton & Hove Albion boss Roberto De Zerbi te nen pawh sawi zawm an ni a, a khawi emaw zawk hian Liverpool an enkawl mai rinna a lian hman hle.

Mahse, Liverpool lamin rin loh lam an hawi thut a, a tira lam rik zinga tel miah lo Feyenoord boss Arne Slot an la lut dawn! Dutch coach chanchin hi Reds fan-te pawhin an la hre lo a, beiseina neih dan tur pawh an harsat.

Coach ṭha?

Liverpool hian Slot hi an la lut dawn a ni mai lo a, a man atan sum an seng dawn! Reds hi Feyenoord nen an inrem tawh a, an inrem danah chuan pound maktaduai 9.4 an seng dawn - £7.7mtd an pe phawt ang a, result a zirin £1.7mtd chu pek belh tur a ni.

Klopp meuh thlak tura Liverpool-in heti taka an duh hi tu nge maw a nih a, eng ang taka ṭha nge maw a nih le? Slot-a team hmu fo tawhtu Dutch legend Marco van Basten chuan a chhanna a neiin a inhria.

Van Basten chuan, "Liverpool a ni emaw, Bayern Munich a ni emaw, eng club lian ber emaw chu a la enkawl dawn, chutiang khawpa kal tur chuan a ṭha a, theihna pawh a nei a ni," tiin a fak.

Player a nih laia footballer ṭha bik ni ṭhin Van Basten chuan, "Slot hi ka be zeuh zeuh a, a hnathawh leh a thil thlir dan hi a ṭha ka ti hle. A player-te nen an inkawmngeih a, tactically-in a ṭha a, thil a sawifiah thiam a, a chi ai ve ngai lo a, a fing em em bawk," a ti.

A sulhnu

Tottenham Hotspur leh Leeds United nen pawha lo sawizawm tawh Slot hian kum 2016 khan coaching a luhchilh ve chauh a, Dutch club SC Cambuur-ah assistant coach leh manager lailawkte niin hun a hmang a, a hnuah AZ Alkmaar chu assistant coach thoa zawmin, 2019-20 season-ah khan coach puitling atan ruat a ni.

Mahse, AZ-ah hian hnathawk ṭha mah se, Feyenoord nen an lo inbiak avangin AZ hian an ban a, 2021-22 season aṭangin Feyenoord hi a zawm. A season hmasa berah hian Europa Conference League final hruai thleng nghal mah se, final-ah 1-0 in AS Roma an ngam lo.

Hei hi Slot-a tawpna erawh a ni lo - season hmasa khan league nomawi a chawipui a, kum ruk chhunga league nomawi an chawi hmasak ber a ni. Tun season-ah Dutch title humhim zo ta chiah lo mah se, KNVB Cup-ah a champion pui tho.

Liverpool captain Virgil van Dijk chuan, "A team a khelhtir dan leh a duh dan enin, Liverpool nena inmil tak a ni," tiin an coach tur hi a lo fak tawh a, Reds ṭantuten an hrechiang châk tawh.

Hlauhthawnna

Kum 45 mi lek ni chunga Slot-a hlawhtlinna hi sawi nep theih a ni lo a, vawi hnih ngawt Dutch football-a coach ṭha ber chawimawina Rinus Michels Award a lo dawn tawh chu coach ṭha a nihzia nemnghettu a ni.

Mahse, ni e, mahse, tih a ngai - Dutch football-a hlawhtlin ringawt hian khawvela league harsa bera chhal ngamah a hlawhtling dawn tih a nemnghet lo. A awih lo tan United boss Erik ten Hag zawh theih a ni ang!

Kum 54 mi Ten Hag hian Old Trafford a pan hma khan Dutch league-ah Ajax chu vawi thum a champion pui a, KNVB Cup-ah vawi hnih nomawi a chawi bawk. Mahse, United-a a hnathawh chu inhrilh nawn ngai loin kan hria a, fan-ten chhuak turin an duh.

Liverpool-ten Dutch football-a manager hlawhtling hlimthla en tur an neih chu Ten Hag a nih miau avangin an hlauthawng a, an hlauhthawnna hi chuti maia dem ngawt theih lah a ni hek lo.

Mahse...

Reds ṭantuten an la hriatchian loh Slot hi amah hrechiangtuten an fak tlat a, hei hi rinhlelhna nena thlirtu fans ṭhenkhat thla timuangtu a ni - Van Basten chuan, "A fin em avangin eng club-ah pawh a kal thei ang, club harsa takah pawh a kal thei ang," a ti thlawt a, Slot a dah sang hle.

Liverpool thuneituten Slot an dah san chhan langsar tak pakhat nia lang chu Klopp ang thoa attacking football khel ṭhin a nihna hi niin a lang a, German coach ang thoin eng team pawh hmachhawn se, tlarhnung venhimna ṭha ber chu tlarhmaa na taka nawr hi a ni, tih hi a ngaihdan a ni.

Tun season Champions League-a Atletico Madrid an lenchilh kha entirna ṭha tak chu a ni. Atletico nena khaikhin a ralah chuan Feyenoord hi club tenau mai an ni. Mahse, Slot hian Spanish club khelmualah attacking football a khel lui ngat a, vawi sarih ngawt target-ah shot an nei hial.

Kum 2015 khan Real chuan Atletico lakah hian target-a 'shot' vawi riat an nei a, Real hnua Champions League-a Atletico khelmuala target-a 'shot' ngah ber chu Feyenoord an ni.

Sum hmang thiam

Slot an fakna pakhat chu sum a hmang thiam hi a ni - Liverpool neitute duh chi! Liverpool neitu Fenway Sports Group hian player hralh phawt loa sum hman an harsat fo a, Klopp pawhin hei hi buaithlak a ti fo nia sawi a awm.Ṭhenkhat chuan a duh ang sum hman tur a awm lo, Manchester City nen inel bawk si hi, a chhuah chhan ang hialin an sawi.

Hei vang hian FSG-in manager langsar ringawt ngaihven lo a, an budget mila che thei tur an zawng hi a awm lo hran lo. Kum 2022 Europa Conference League final-a Feyenoord a hruai thlen khan club langsar dang an lo lang nghal a, final-a bul ṭan player pasarih ngawtin an chhuahsan nghal.

Mahse, Slot hian player man tlawm, mahse, ṭha si Santiago Gimenez, Sebastian Szymanski leh Mats Wieffer te chu man tlawm takin a la lut hlawm a, heng player-te hmang hian league nomawi a chawi zui.

Tun season ṭan dawn khan player langsar Szymanski leh Orkun Kokcu a chân leh a, mahse, Dutch Cup-ah an champion leh ta tho. Tun hnai season hnih chhungin, season khatah £30mtd vel ve ve bak player lei nan a hmang lo a, an elpui ber Ajax erawh season khata £100mtd seng ang an ni thung.

Naupang leh Pep

Slot hian player naupang zawkte chance a siam ṭhin bawk - Arsenal defender Jurrien Timber-a phirpui Quinten Timber leh Quilindschy Hartman te chu a hnuaia player ṭhangduang an ni a, tun season-ah Netherlands tana an match hmasa ber an khel ve ve ta hial.

Dutch coach hi Pep Guardiola ngaisangtu a ni bawk a, Klopp-a elpui ber coach a ngaisang tlat hi Kop tan hriat a nuam lo mai thei. Slot chuan, "Pep nena inkhaikhin chu ka duh hauh lo a, mahse, keimah ang thoa inkhel thunun duh mi a ni.

"Keimah leh keimah ka inen a, khelmual kan luh hmaa hnehna chan duh tawh mi ka ni. Training, pre-match team talk leh a fiah thei ang bera player-te hnena tactic hrilhfiah a, chumi hmanga inkhelh hma hauha kan chak anga inhriatna neih duh ka ni," a ti!

Slot chuan sawi zawmin, "Khawvelah hian Manchester City aia an inkhel en nuam tih zawk ka nei lo. Napoli, Arsenal leh Brighton pawh an hmuhnawm ka ti," a ti a, Liverpool a sawi tel ve lo.

Balance aw balance!

Season hmasa khan Leeds, Crystal Palace leh Tottenham Hotspur te pawhin Slot hi lakluh tumin an hel viau a, mahse, league nomawi chawi hlim a nih avangin a hmanhmawh lo - Feyenoord-a cham a thlang a, a tawpah chuan Liverpool hial an lo lang ta.

Van Basten chuan, "AZ leh Feyenoord te game hmuhnawm tak a khelhtir thei a nih chuan, club lian phei chu a tihtir thei em em ang," a ti a, Slot hi a ringtawk hle.

Slot an fakna pakhat chu pressure sanga a talbuai lo leh thil a 'balance' thiam hi a ni. Season hmasa khan league-ah kum 17 chhunga a vawi khat nan Ajax chu khualmualah an hneh a, mahse, Slot chuan, "Amsterdam-a kum 17 chhunga a vawi khat nana chak aia tum ropui zawk kan nei," a ti hmiah!

Tun season-ah pawh Feyenoord hi an khel ṭha viau. Mahse, a danglamna erawh team 'form' em em PSV Eindhoven an lo awm ve chu a ni. PSV hi match 31-ah vawi khat chiah an la tlawm a, Feyenoord hi vawi hnih an tlawm thung - PSV an champion chiang tawh a, mahse, Slot erawh hmun ropui zawkah a kal dawn e.