AIFF-in Bagan striker Sadiku an hrem

Indian Super League final khel tur Mohun Bagan-in chanchin lawmawm lo hriat tur an nei a, striker Armando Sadiku chu Odisha FC nen semifinal an khelh ṭuma a chet dan avangin match hnih chhung inkhel thei lo tura hrem a ni - Inrinni zana Mumbai City nen final an khelh hunah a inlan thei dawn lo tihna a ni.

Sadiku hi Odisha nen an inkhelh ṭum khan match official-te chu mawi lo takin a tihel a, hei vang hian All India Football Federation hnuaia Disciplinary Committee chuan match hnih khel thei lo tur hian an hrem a, kum hnih chhunga a chet dan ngaia a chet leh chuan match hnih dang an hrem leh bawk ang.

Sadiku hi match hnih khel lo tura hrem a nih bakah hian Rs. 50,000 chawi tura tih a ni bawk a, Albania tan vawi 39 inlana goal 12 khungtu striker tel loin Bagan-in ISL final an hmachhawn a ṭul dawn.

Las Palmas striker hlui Sadiku hian tun season league match 22 a khelhah goal riat khungin, assist vawi khat a nei tawh a, awm lo mah se, Kolkata club hian match 22-a goal 10 leh assist vawi sarih neitu Dimitri Petratos leh match 22-a goal 11 leh assist vawi hnih neitu Jason Cummings an nei tel tih hriat a ṭha.

ISL final hi May 4, Inrinni zan dar 7:30-ah khelh tur niin, Mohun Bagan leh Mumbai City ten champion an inchuh dawn. Bagan hian midfielder Lalrinliana Hnamte (Terina) chu Mizo player an neih a ni a, Mumbai-ah hian forward Lallianzuala Chhangte, midfielder Lalengmawia Ralte (Apuia) leh defender Hmingthanmawia Ralte (Valpuia) te an awm thung.