Kawng dik kan zawh - Conte

Inter Milan manager Antonio Conte chuan hlawhtlinna chang turin kawng dik an zawh thu a sawi a, Champions League khel chau mah se Serie A lamah hnehna chan chhunzawm theih a inbeisei.

Conte naute hian zanin dar 10:30-ah Parma an mikhual dawn, kar leh Thawhleh zanah UCL khel turin Real Madrid an lenchilh zui dawn bawk - tun hnaiah match hautak an ngah hlawm avangin player siksawi thiam a ngai khawp ang.

Italian manager Conte chuan, "UCL match hnih khelh aṭangin point hnih chauh kan hmu a ni mai thei, khelmual chhunga ka naute khelh dan thlir erawh chuan lawmna tur tam tak a awm. Season hmasa lama kan inkhel aiin nasa takin hma kan sawn tawh," tiin a sawi.

Season hmasa khan Inter hi Serie A-ah pahnihna an ni, an chungah Juventus chiah an awm. Kuminah Old Lady lamin manager thar Andrea Pirlo kaihhruaina hnuaiah beisei angin season an ṭan fuh lo a, club dang tan pawh nomawi chawi theihna kawng a inhawng zau viau.

Barcelona ngam lo hlim Juve hian Pathianni zan dar 7:30-ah Spezia an lenchilh dawn a, match thum chawl tawh an thiampuipa Cristiano Ronaldo chu an chawr thei dawn em tih a la chiang lo. Ronaldo a inlan thei tawh a nih chuan Turin club tan chanchin lawmawm bik a ni ang.

Portuguese forward hi ram tana a feh chhuahna lamah coronavirus a kai a, vawi thum endik leh tawh niin hri hian a la kiansan lo. Real Madrid player hlui hian natna a nei si lo, a endikna khawl a rin tawk loh thu a sawi hial.