Vardy telna Leicester City an chak

31st October, 2020

Jamie Vardy-a'n Leicester City tan goal khung hna a thawk chhunzawm zel a, Ningani zan khan Europa League group stage inkhelah AEK Athens chu 2-1 in an hneh.

Athens keeper Panagiotis Tsintotas-a'n minute 18-na lekah Vardy hi a ti tlu a, English striker hian a penalty hlawhchhuah hi harsatna nei loin goal-ah a chantir.

Vardy hian hliam vangin Foxes tan match hnih a khel lo hman a, kar hmasa khan Arsenal lakah bench aṭanga luhtir niin inkhela goal awmchhun a khung.

English striker hi goal a khung hian kum 33 leh ni 292 mi a ni a, Foxes tana Europe-a goal khung thei upa ber Wes Morgan-a record chelh lai chu a khum.

Morgan hian March 2017 khan Champions League-ah Sevilla hmachhawnin goal a khung a, hetihlaia a kum hi Vardy aiin ni 240-in a nau zawk.

Foxes tan Bangladesh lam chhuak, England-a piang leh seilian Hamza Choudhury chuan minute 39-naah an goal hnihna mawi zetin a khung a, AEK-in Muamer Tankovic hmangin goal khat khung ve mah se si phurh erawh an sut zo thei lo - Foxes tan Cengiz Under chuan woodwork-a tih per bawk.

Brendan Rodgers-a enkawl Leicester-in Europa League group stage match hnih an khelhah hnehna an chang ve ve a, mahse Greece-ah erawh inkhelh zawhah chanchin lawmawm lo an nei zui.

Defender ṭangkai Timothy Castagne chu a inhliam a, Rodgers chuan November international break zawhah a lo kir theih a beisei chauh thu a sawi.

Atalanta aṭanga Foxes pantu hi Thawhṭanni zan dar 1:30-a Leeds United an lenchilh hunah a inlan thei dawn lo tihna a ni a, Braga (Europa League) leh Wolves (Premier League)-a hmachhawn thei lo bawk ang.

Jonny Evans chu AEK Athens lakah hian bul ṭan tura tih ni mah se a inlan thei lo bawk a, Evans erawh club training pawh pangngai taka a zawm avangin a hliam hi 'serious' lo tura ngaih a ni.

Group G inkhel dangah Sporting Braga chuan 2-1 in Zorya Luhansk an hneh ve bawk a, Braga tan Paulinho leh Nicolás Gaitán-ten goal khat ve ve an khung - Ukrainian club Zorya tan Dmytro Ivanisenya chuan hun pek belhah goal khung ve mah se 'comeback' nan a tlai tawh.