Rangers-in hna ngai an thawk

Steven Gerrard enkawl Rangers-in an hna ngai an thawh chhunzawm a, chu chu point thum hlawhchhuah a ni - Ningani zan khan Europa League-ah Lech Poznan chu 1-0 in an hneh.

Rangers goal awmchhun hi minute 68-naa Alfredo Morelos khung a ni a, Colombian striker hian Europe-a match 36-a khelhah goal 21-a khung tling ta. 

Scottish Premiership hmahruaitu Rangers-in an muala European game an khelh hnuhnung 20-ah vawi khat chiah tlawm an la nei a, tun season inelna hrang hrangah match 17 khel tawhin tlawm an la nei lo - vawi 15 an chak a, vawi hnih an khingpui an inhnehtawkpui. 

Group D inkhel dangah Benfica chuan 3-0 in Standard Liege an sawp bawk a, Portuguese club hian penalty vawi hnih an khung - Pizzi leh Luca Waldschmidt-ten penalty vawi khat ve ve an pet a, Portuguese midfielder Pizzi hian goal khat dang a khung leh bawk.