Kolkata veltu Ravindra Jadeja

Indian Premier League khelh mekah Chennai Super Kings tan playoff beisei tur a awm tawh lo a, chuti chung chuan October 29, Ningani zan khan Kolkata Knight Riders wicket rukin an hneh. Chennai-in hnehna an chan theih nan Ravindra Jadeja-a'n ball hnuhnung pahnihah six a vua a, Kolkata tan erawh playoff khelh a harsa sawt dawn.

Kolkata hian Chennai lakah point an hlawhchhuah loh avangin an match hnuhnung berah Rajasthan Royals pawh hneh se playoff khel lo thei dinhmunah an ding.

Dubai International Stadium-a inkhelah Chennai Super Kings-in vawm hmasak an thlang a, Kolkata opener Nitish Rana-a'n run 87 zet a siam. KKR tan Shubmam Gill (26), Dinesh Karthik (21*) leh Rinku Singh (11) ten double digit runs an siam a, over 20-ah 172/5 runs an siam.

Super Kings tan hna awlsam a ni lo a, opener Ruturaj Gaikwad-a'n ball 53-ah run 72 siamin MS Dhoni hote tan chak beiseina a siam. Captain Dhoni hian run khat chauh siam mah se Ravindra Jadeja-a'n mawhphurhna a la a, ball 11 lekah run 31 vaw chhuakin hnehna a chanpui.

Over tawp berah Chennai tan run 10 lai siam a ngai a, Kolkata tan Kamlesh Nagarkoti-a'n a vawm. Ball hmasa pathum Sam Curran-a'n hmachhawnin run thum chauh a siam a, Kolkata dinhmun a ṭha zel. A tawp ball hnuhnung pathum Jadeja-a'n a hmachhawn a, ball hmasa berah run a siam lo.

Ball hnuhnung pahnihah Chennai-in chak turin run sarih an mamawh a, Jadeja-a'n a hmasa zawk six run vuak nan a hmang. India all rounder Jadeja hian ball tawp berah run khat chauh mamawh mah se six run tho a vaw chhuak a, Chennai-in run 178/4 vaw chhuakin wicket rukin hnehna an chang.

Chennai-in hnehna an chan chiah hian pakhatna dinhmun luahtu Mumbai Indians-in playoff an khel dawn tih a chiang nghal. Mumbai hian qualifier 1 nge eliminator an khelh dawn tih a chian loh avangin an match hmabak erawh a la pawimawh tho.

Mumbai Indians hnung zui tur pathum a la hriat loh a, Chennai Super Kings erawh an ni lo tih a chiang tawh. Dhoni hoten nomawi beisei tawh lo mah se table mawnghphah erawh an chhuahsan thei thung.

Vawiin leh Pathianniah IPL match hnih ve ve a awm dawn a, inkhel pawimawh vek a ni tawh. League round hi November 3, Thawhlehni zanah khelh zawh a ni dawn a, cricket ngainatute tan chuan zan tinin inkhel hmuhnawm a awm chho ang.