Indian Super League: Champion a hriat dawn ta

India rama football league sang ber leh ngaihven hlawh ber Indian Super League final chu zanin dar 7:30 hian khelh a ni dawn ta a, Mizo pathum awmna Mumbai City leh Mizo pakhat kawltu Mohun Bagan ten India rama football thiam ber nih an inchuh ang.

Mohun Bagan-ah hian midfielder Lalrinliana Hnamte (Terina) chu Mizo player awm a ni a, Mumbai hian forward Lallianzuala Chhangte, midfielder Lalengmawia Ralte (Apuia) leh defender Hmingthanmawia Ralte (Valpuia) an kawl thung.

Kolkata club hian season hmasa khan ISL nomawi an lo chawi tawh a, an nomawi humhim an tum dawn - Mumbai hian 2020-21 season khan league hmahruaitu ni chungin nomawi an lo chawi tawh a, hemi hnuah erawh an champion leh tawh lo.

A 'hot' dawn

ISL-in final khelhna tur hmun fel takin an duang a, league-a dinhmun sang zawk khelmualah final khelh a nih tur thu an sawi - hei hi Bagan-in an vanneihpui a, Salt Lake Stadium-ah final an khel dawn.

Kolkata khawpuia stadium lar takah hian fans 85,000 an leng a, final ticket hi an hralh zo tawh! Mohun Bagan-in thlawptu an nei ṭha dawn tih a chiang a, Mumbai tan hei ringawt pawh hi zamna tham tur a tling ang.

Mahse, Mumbai forward Lallianzuala Chhangte chuan, "Ka zam phah lo a, fans an tam poh leh kei chuan nuam ka ti zawk. Kan phur leh lutuk ang tih hi a hlauhawm ber," tiin Vanglaini a hrilh a, Salt Lake Stadium-ah Kolkata mipui velh a tum.

Coach thlak ve ve!

Final-a inhmachhawn tur team pahnih hian inanna an nei a, tun season-ah coach an thlak ve ve! Bagan hian season hmasaa champion puitu Juan Ferrando chu January 3 khan an ban a, club technical director leh ATK leh Bagan inzawm hmaa an coach Anonio Lopez Habas an la lut.

Habas-a hnuaiah league match 12 khelin vawi kua ngawt a chakpui a, vawi hnih chiah draw neiin, vawi khat an tlawm. Valencia leh Celta Vigo boss hluiin hna a thawk ṭha takzet a, nomawi chawi ngeia season khar a duh ang.

Mumbai pawhin season laklawhah coach an thlak a, anni thlak chhan erawh coach Des Buckingham-a'n League One club Oxford United a zawm vang a ni. Melbourne City assistant coach Petr Kratky chuan December khan Mumbai a enkawl zui a, Buckingham-a tihtheih loh tiin, ISL final a hruai thleng nghal.

Phuba a ṭul!

Mumbai hi rei tak chu league hmahruaitu an ni a, an league match tawp berah Bagan an hmachhawn - he inkhelah hian league winner ni tura Mumbai mamawh chu 'draw' a ni a, mahse, Bagan-in hnehna changin league winner shield an dawng daih!

Tun season-a team pahnih intawn hmasak zawkah Mumbai chak mah se, league match tawp bera an tlawm dan hi a 'na'. Mahse, Mumbai forward Lza chuan, "Kha inkhela kan tlawmna kha infuih phur nan kan hmang dawn a ni," tiin Vanglaini a hrilh.

Chutihrual chuan hna awlsam tak erawh a ni dawn lo - Bagan hi ISL-a sum hmang na ber pawl an ni a, kil tinah player ṭha an kawl. Fans puihna nena Mumbai hneh nawn a, nomawi chawi an châk dawn.

Hello Mumbai

Mumbai coach Kratky-a'n 4-3-3 a hmang ṭhin a, tlarhma laiah Jorge Pereyra Díaz awmin, ani hi Lza leh Bipin Singh ten an thlawp thei ang - Bipin aiah Vikram Pratap Singh chu lut zawk thei dinhmunah a ding bawk.

Midfield-ah Apuia chu bul ṭan chiang a ni a, Dutch midfielder Yoell van Nieff nen tlarhnung an venpui ang a, Aizawl FC player hlui Jayash Rane chu tlarhma pui turin midfield-ah a awm thei bawk - Rane a luh loh chuan Bipin chu tawlh hnungin Vikram-a'n Lza leh Diaz a thlawp thei ang.

Tlarhnungah captain Rahul Bheke hoin Spanish defender Tiri, Indian centre back ṭhangduang Mehtab Singh leh full back Akash Mishra te ding tur an awm dawn a, si ban nghaktu Phurba Lachenpa pawh a rintlak viau zel.

Team ṭha Bagan

ISL-ah Bagan tluka sum seng huai an awm kher lo mai thei - an pawisa ngah hi an hrechiang! Habas-a'n fimkhur takin 3-2-4-1 a hmang ṭhin a, Mumbai lakah pawh hetiang bawk hian player a rem leh a rinawm.

Si ban nghaktu Vishal Kaith a puitling ta viau a, a hmaa ding turin defender hlawh hnem rual Anwar Ali, captain Subhasish Bose leh Real Mallorca defender hlui Héctor Yuste te an awm dawn a, Abhishek Suryavanshi leh Finland international Joni Kauko ten midfield aṭangin tlarhnung an pui thei dawn bawk.

Tlarhmaah Armando Sadiku hrem a nih avangin a awm dawn lo a, a aiah Jason Cummings lutin, a hnung chiahah Dimitri Petratos leh Anirudh Thapa an awm ang a, mual sir aṭangin Manvir Singh leh Liston Colaco ten an thlawp thung ang.

Player en bik tur

Mohun Bagan leh Mumbai City-ten player langsar an kawl nual a, foreign player langsar bik, zanina en bik sual lo tur kan tarlang e.

Dimitri Petratos (Mohun Bagan)

Kum 31 mi striker hian A League-ah a hun tam zawk hmangin, South Korea, Malaysia leh Saudi Arabia-ah te top flight league a lo khel tawh bawk a, tun season-ah Bagan tan match 22 khela goal 10 khungin, assist vawi sarih a nei tawh.

Jason Cummings (Mohun Bagan)

Australia tan vawi thum inlanin, goal khat a khung tawh a, Nottingham Forest striker hlui hian Championship, League One leh Scottish Premiership-ah te hming a lo chher tawh a, season hmasa khan A League-ah Central Coast Mariners tan match 28-ah goal 20 a khung. Bagan tan tun season-ah league match 22 khela goal 11 khungin, assist vawi hnih a nei.

Joni Kauko (Mohun Bagan)

Finland international hian an ram bakah Germany leh Denmark-ah te football a lo khel tawh a, Euro 2020-ah khan Finland tan a feh chhuak. Bagan tan player pawimawh niin, defensive midfielder a ni.

Jorge Pereyra Díaz (Mumbai City)

Argentine striker hian Argentina, Mexico, Malaysia leh Bolivia-ah te top flight league a lo khel tawh a, tun hi ISL-ah season thum hun a hmanna niin, Mumbai player pawimawh a ni a, tun season-ah league match 16 khelin, goal kua a khung tawh.

Yoell van Nieff (Mumbai City)

Netherlands tan age level-ah lo inlan tawhin, Dutch top flight league Groningen tana khel ṭhin a ni a, Hungarian club Puskas AFC tan a khel tawh bawk a, kum 30 mi niin, defensive midfielder a ni.

Tiri (Mumbai City)

Kum 32 mi centre back hi Indian football-ah a mikhual lo. Kum 2015 khan ATK tan a lo khel tawh a, Jamshedpur FC leh ATK Mohun Bagan tan khel lehin, tun season khan Mumbai hi a zawm. Spanish division hniam lamah a inlan ṭhin a, tun season-ah Mumbai tan league match 22 a khel.