Lza tan golden chance?

Season hmasa khan Lallianzuala Chhangtein ISL Hero of the League award a dawng a, AIFF Player of the Year-ah thlan a ni zui. Lunglei tlangval tan "Kum ṭha a ni e" tih loh rual a ni lo a, khatiang ang tak kha footballer tan tawn zen zen theih a ni lo.

Mahse, India coach Igor Stimac-a'n, "Khawvel tana Ronaldo a hlu ang zet hian, India tan Lallianzuala hi a la pawimawh zel ang," a tih player hian chawlh zai a rel lo a, Indian football ngainatute titi tui ber a ni leh tawh!

Lza hian tun season ISL-ah league match 24 khel tawhin goal 10 a khung a, assist vawi ruk a nei bawk - season hmasaa a statistic nen a inang chiah. Tun season-a a danglam lehzual bikna erawh a chet ṭhat hun a pawimawh lehzual ṭhin.

Semifinal-ah FC Goa laka 2-0 a an hnufual reng hnuin, minute 90 hnuah 3-2 in an comeback a, goal hnih hi Lza khung a ni a, second leg-ah goal khat dang a khung leh bawk - league match tawp berah khan Bagan lakah a khung tawh bawk.

Mumbai City hian ISL nomawi an chawi a nih ngat chuan Lza tan golden ball dawn leh chance a sang dawn a, a tithei a nih ngat chuan ISL-a he award a zawna dawng thei hmasa ber a ni dawn - a ropui asin!

Mahse, Lza rilru luahtu ber erawh mimal hmingṭhatna ni loin ISL nomawi a ni. Lunglei tlangval chuan, "Tunah chuan mimal chawimawina tih lamin rilru a luah rih lo. Chak ila, champion ila, chu chu ka duhthusam ber a ni," tiin Vanglaini a hrilh.