Victor Font-a'n Xavi leh Pep a duh

Barcelona president Josep Maria Bartomeu-a'n banna a thehluh hnuah Barca President nih inchuh boruak thawm a ring leh zual a, Catalan club hruaitu nih tum zinga mi Victor Font chuan Barcelona President-a nih chuan Pep Guardiola leh Xavi chu club kaihruai tura a hruai kir tur thu a sawi. 

Catalan club hian March 20 & 21, 2021-ah club President thar hi an thlang dawn. Delta Partners CEO ni lai Font bakah hian Barca president hlui leh politician Joan Laporta, kum 2015-a Barca President ni tur tling zo leh sumdawng hausa Jordi Farre, Barca director ni tawh  leh dan hremi Toni Freixa leh sumdawng hausa Lluis Fernandez-te chuan Barca President hna hi an chuh tur thu an tichiang tawh. 

Font chuan, "Hma-chhawp thui tak nei leh ṭha tak din hi kan tum ber chu a ni a, Johan Cruyff-a kalphung he club-in kan lo kalpui hi kan vannei hle. Khawvela footballer ṭha ber ber ni ṭhin, he style hretute pawh kan club fans leh hmangaihtu, Pep Guardiola, Xavi, Andres Iniesta leh Carles Puyol-te an ni. Anni hian Barca an hmangaih a, mahse vawiinah erawh Barca tan an thawk lo a, he club-ah hian kan hruaikir an ngai a ni," a ti. 

El Clasico-a an chak zawh loh hnuah Barca hian Champions League-ah Juventus chu 2-0 in an hneh a, zanin dar 1:30-ah Alaves chu khualmualah an lenchilh dawn. 

Hetihlai hian Barca hian chanchin lawmawm an nei a, goalkeeper Marc-Andre ter Stegen chuan group training a zawm leh tawh - German keeper hian nipui lai khan a khupah hliam tuarin zai tir a ni a, tun season-ah a la inlan lo.