Chelsea-in Spurs beiseina an titawp?

Season ṭantira champion tum, a tawp lama Champions League khelh phak tum Tottenham Hotspur tan Champions League khelh phak pawh a harsa dawn - Ningani zan khan khualmualah Chelsea chu 2-0 in an ngam lo a, Liverpool-in an lo la hmuak zui!

Chelsea tan Trevoh Chalobah chuan minute 24-naah goal hmahruai khungin, Nicolas Jackson chuan minute 72-naah an goal hnihna a khung a, Spurs lamin a chhanletna tur an neih loh avangin Stamford Bridge-ah an tlawm.

Ningani zan inkhelah Chelsea tan Jackson a langsar a, Spurs tlarhnung tan mangchhia a ni - a vanneih zan ni se, goal khat aia tam zawk khung thei a ni. Conor Gallagher lam hmaih a thiang lo. English midfielder hi Chelsea chuan tun hnaiah hralh an tum tih thawm a awm a, hetiang boruak karah hian fan-ten Gallagher an thlawpna an lantir.

Chelsea tana captain armband hrenga inlan Gallagher hian amah thlawptute chu thiltih hmangin a rul let a, an goal hmasa zawk pawh a freekick aṭanga ball kal a ni - English midfielder hian theihna sang tak a nei tih a pholang nawn.

Blues-in hnehna an chan avangin table-ah pariatnaah an awm chho a, Europa Conference League khelh beiseina an nei thar ve leh ta. Premier League-a parukna chinin ECL hi an khel dawn a, Chelsea hian parukna Manchester United chu match li khelh tur la awmah point thum chiahin an phak tawh lo - Blues hian Pathianni zan dar 6:30-ah West Ham an mikhual zui ang.

Hetihlai hian Spurs tan erawh Champions League khelh a harsa sawt dawn - Chelsea laka an tlawm avangin palina Aston Villa chu point sarihin an phak lo mek a, match khatin khel tlem zawk mah se, an hmabak fixture enin an dinhmun a derthawng ta hle.

Spurs hian match li khelh tur la neiin, an hmachhawn tur zingah Liverpool leh Manchester City an la tel a, Liverpool hi Pathianni zan dar 9:00-ah an lenchilh dawn - Reds pawh hi tun hnai an result a ropui lo hle.

Liverpool hi season tawpah Jurgen Klopp-a'n a chhuahsan dawn a, an coach hi ropui taka nomawi pali nena an thlah rinna a lian hman. Mahse, League Cup an champion hnuah FA Cup leh Europa League aṭangin an tla a, Premier League-a an match hnuhnung panga aṭangin vawi khat chiah an chak bawk!

Hei mai a ni lo - West Ham nen an league match hnuhnung berah 2-2 in an inhnehtawk a, he inkhelah hian an thiampuipa Mohamed Salah leh coach Jurgen Klopp chu an inhmu thiam lo.

Mahse, Klopp chuan engkim an chinfel tawh thu nimin khan a sawi. German coach chuan, "Engkim chinfel a ni tawh - Salah nen hian kan thawkdun rei tawh a, chutiang ni lo se, a harsa mai thei. Mahse, kan inhriatchian avangin kan inzah tawn em em a, buaina kan nei tawh lo.

"A pawimawh ber erawh kan khelh ṭhat zel a, result kan neih ṭhat a ni a, chutiang ni se, khatiang buaina pawh kha a thleng lo ang," a ti!

Klopp chuan English club-te fixture hautak bik lutuk sawi zuiin, "European football-ah pawh English club-te kan chet ṭhat tur angin kan che ṭha thei lo a, player-te an chau lutuk. Heti taka kan inchhawr nasa hi chu mihring dikna chanvo humhim duhtu pawl Amnesty International hi an rawn inrawlh ka ring zawk hial mawle," a ti a, fixture hautak lutuk chu a sawisel.