EPL champion tura rinkai pahnih Arsenal leh Man City an inlan dawn

Premier League hmahruaitu Arsenal chuan vawiin tlai dar 5:00 hian Bournemouth an mikhual dawn a, zan dar 10:00-ah champion lai Manchester City leh Wolves an inhmachhawn zui ve leh bawk ang.

Gunners leh Man City inkarah hian point khat chiah a awm - Pep Guardiola nauten match khat in an khel tlem zawk. Champion tur tan chuan vawi khat lek chetsual pawh a pawi thui thei hle tawh tihna a ni a, fimkhur a ngai takzet.

Match pathum

Arsenal hmabaka Chelsea leh Tottenham Hotspur an awm lai khan, mi tam tak chuan an chetsualna turah an ngai - mahse London Derby pahnih aṭang hian point ruk an hmu thei a, tunah chuan hmabak match pathum chauh an nei tawh.

Mikel Arteta naute tana tih theih sang ber chu match zawng zawnga chak vek a ni, an chak vek a nih pawhin champion tur chuan Man City chetsual an chan tel a ngai; Bournemouth hneha an inkar an tizau leh lailawk thei a nih chuan Citizens tan pressure an siam ang.

Gunners hian tunah chuan hliam langsar tak an nei lo tia sawi theih a ni, defender Jurrien Timber pawhin training a zawm tawh - mahse Dutch defender hi a inlan a la rinawm loh deuh a, season tawp hma chuan a hmel kan hmu leh hmanin a rinawm.

Bournemouth hnuah Manchester United an tlawh dawn - Old Trafford lenglut tura inbuatsaihna ṭha ber chu vawiin tlaia an match khelh tur hi a ni ang, season hmasa lama an thamralna ang kha tawn leh an duh loh chuan 'chak' an ngai.

Fimkhur a ngai

Nikum September thlatawp kha a ni a, team ṭha leh ropui zawk Manchester City chu Wolves mualah an lenglut a, rinkai zawk ni mah se Man City hi 2-1 in an chak lo. Guardiola naute tan chetsual nawn a pawi thui thei dawn, fimkhur taka an khelh a ngai ang.

Man City hi Champions League aṭangin an tla tawh a, tunah chuan EPL-ah an rilru zawng zawng an hmang thei, an hmabak pakhat FA Cup final chu league match khelh zawh hnua khelh tur a nih avangin tuna ngaihtuah a ngai lem lo.

Goal thun khawl Erling Haaland-a'n khung loh ṭum nei ve ta zauh zauh mah se tun hnaiah a zia a chhuah leh tawh, zaninah pawh a tir aṭanga a luh a rinawm - Wolves tan Norway international striker hi ven uluk a ngai hle ang.

An squad a chhah avangin Pep-a'n player a siksawi kual nasa ṭhin. A hman thiam tak Phil Foden chu Nottingham Forest an hneh ṭumin hahchawlhtir a ni a, tawnhriat nei ṭha Kevin de Bruyne, Bernardo Silva leh Rodri te an neih avangin zaninah point thum hmu tura ngaih a ni.