CYMA Cricket : Durtlang, Zembawk leh Zotlang an chak

CYMA leh CAM buatsaih 12th Inter Branch Cricket tournament last 16 chu nimin khan khelh zawh a ni a, a thiam pariat chiah an dam tawh. Champion hmasa ber Armed Veng chu Zotlang lakah an tlawm a; inkhel dangah team ṭha Durtlang leh Zemabawk ten hnehna an chang thung.

Quarterfinal-ah hian Zotlang, Durtlang leh Zemabawk te luh hmain Ramhlun Venglai, Chanmari, Ainawn, Hunthar leh Luangmual te an invaw kai tawh bawk.

1st Bn MAP Ground, Mualpuia inkhelah Durtlangin Ramthar Veng hneh turin harsatna an tawk lo a, Mizo batter ṭha ber zinga mi Lalhruaizela'n 80 runs a vaw chhuak.

Joint YMA Field-a inkhelah Zemabawkin Bawngkawn lakah team ṭha an ni tih an lantir a, over 20-ah 67 runs chauh an siamtir. Over 9.4 lekah Zemabawk hian 69 runs siamin wicket riatin hnehna an chang.

Zotlang leh Armed Veng an inkhel tawk a, C. Lalrinsanga'n 87 runs siamin Zotlangin target atan 138 runs an chhawpsak. Armed Vengin over tawp ber thlengin chak beiseina an nei a, mahse top order-te chet ṭhat tawk loh an tuar. Over 20-ah Armed Vengin 130 runs siamin run sarih an chak lo a, CYMA Cricket-a champion hmasa ber an tla.